Армянская рэвалюцыйная фэдэрацыя «Дашнакцуцюн» (АРФД) выступіла з заявай, абвясьціўшы, што спыняе свой удзел у палітычнай кааліцыі з Рэспубліканскай партыяй Армэніі.
«У выніку народнага руху ў Армэніі склалася сытуацыя, якая ўжо на працягу некалькіх дзён трымае ў напружаньні ўсё грамадзтва.
На шчасьце, да гэтага часу ўдалося пазьбегнуць найгоршых сцэнарыяў разьвіцьця. У апошнія дні АРФД пасьлядоўна імкнулася з дапамогай дыялёгу знайсьці прымальнае і разумнае рашэньне ў інтарэсах краіны і народу.
Аднак так ня можа працягвацца доўга. Могуць узьнікнуць сур’ёзныя выклікі. Мы перакананыя, што сытуацыя, якая склалася, павінна вырашыцца выключна ў рамках канстытуцыйнасьці і законаў.
Прымаючы пад увагу цяперашнюю сытуацыю, мы заяўляем аб спыненьні нашага ўдзелу ў палітычнай кааліцыі. Такім чынам, Нацыянальны сход павінен абраць прэм’ер-міністра, які карыстаецца даверам народу для фармаваньня ўраду, праграма ўнутранай і зьнешняй палітыкі якога павінна перасьледаваць наступныя мэты:
а) разрадзіць ўнутрыпалітычную напружанасьць,
б) пераадолець палітычны крызіс,
в) гарантаваць разьвязаньне назапашаных праблем, вызначаючы дакладныя прыярытэты,
г) падрыхтаваць і правесьці пазачарговыя парлямэнцкія выбары з захаваньнем паўнавартасных дэмакратычных умоваў», — гаворыцца ў заяве кіраўніцтва АРФД.
