29 сакавіка суд Ленінскага суду Берасьця прызнаў блогера Сяргея Пятрухіна вінаватым у непадпарадкаваньні міліцыянтам і пакараў штрафам памерам 1102,5 рубля (45 базавых велічыняў).
Судзьдзя Аляксандар Семянчук ухваліў такое рашэньне, заслухаўшы сьведкаў-міліцыянтаў і тлумачэньні Пятрухіна. Сяргей Пятрухін віны не прызнаў, ён кажа, што непадпарадкаваньня супрацоўнікам міліцыі не было.
«45 базавых. Гэта з улікам, што ў мяне сын і я беспрацоўны. Ды адседзеў яшчэ трое сутак. Таму дзякуй, што далі не 50, а толькі 45», — сказаў Свабодзе Сяргей Пятрухін пасьля суду.
Блогер заявіў, што абавязкова будзе абскарджваць вырак.
Сяргей Пятрухін быў затрыманы ўвечары 23 сакавіка. Яго даставілі ў пастарунак, абвінавацілі ў непадпарадкаваньні міліцыянтам, і выходныя ён правёў у ізалятары. У нядзелю 25 сакавіка Сяргей Пятрухін плянаваў асьвятляць Дзень Волі і акцыю пратэсту праціўнікаў акумулятарнага заводу ў Берасьці.
Пятрухін заявіў, што лічыць суды перасьледам за «дапамогу ў асьвятленьні незадавальненьня грамадзянаў, якія дабіваюцца спыненьня будаўніцтва акумулятарнага заводу».
Агулам Пятрухіна аштрафавалі за апошні час на 150 базавых велічынь — больш як на 3000 рублёў.
