У гонар 100-годзьдзя абвяшчэньня незалежнасьці Беларускай Народнай Рэспублікі больш за паўсотні беларусаў зь Філядэльфіі, Нью-Джэрсі, Вірджыніі і Вашынгтону сабраліся каля манумэнту Свабоды ў Філядэльфіі.
«Стагодзьдзе таму Беларусь абвясьціла сябе незалежнай дзяржавай. Гэтаксама як і чалавек на гэтым манумэнце, які імкнецца да пэрсанальнай свабоды, так і Беларусь, нягледзячы ні на што, працягвае ісьці наперад, да ўласнай свабоды і незалежнасьці», — так патлумачылі арганізатары сымбалічнасьць месца збору ўдзельнікаў.
Прамоўцы з розных гарадоў казалі пра падзеі стогадовай даўнасьці і стан рэчаў у сучаснай Беларусі.
Арганізаванае шэсьце прайшло па галоўнай вуліцы Філядэльфіі Broad street пад гімн «Мы выйдзем шчыльнымі радамі» і лёзунгі «Жыве Беларусь».
Завершылася сьвята нефармальным адзначэньнем у адным з пабаў гораду.
