22 лютага Рада Эўрапейскага зьвязу прыняла рашэньне працягнуць абмежавальныя меры супраць Беларусі на год, да 28 лютага 2019 году.
Сярод абмежавальных мераў – забарона на пастаўкі зброі, забарона на экспарт тавараў якія могуць быць скарыстаныя для ўнутраных рэпрэсій, а таксама замарожваньне актываў і забарона на ўезд чатырох чалавек, якіх падазраюць у датычнасьці да палітычных зьнікненьняў.
Раней з усёй зброі, якая можа выкарыстоўвацца як лятальная, у Беларусь дапускалі толькі біятлённую.
Цяпер Эўразьвяз дадае да сьпісу выключэньняў яшчэ і паляўнічую і спартовую малакалібэрную зброю.
Упершыню ЭЗ увёў эмбарга на пастаўкі зброі, а таксама забараніў выдаваць візы 174 асобам, уключна з прэзыдэнтам Лукашэнкам, і замарозіў актывы гэтых асобаў і чатырох беларускіх кампаній пасьля гвалтоўнага здушэньня пратэсту супраць фальсыфікацыі прэзыдэнцкіх выбараў у сьнежні 2010 году.
У лютым 2016 году Брусэль выкрасьліў са сьпісу санкцый прадпрыемствы і 170 чалавек, у тым ліку і беларускага прэзыдэнта, спаслаўшыся на тое, што сытуацыя ў галіне правоў чалавека палепшылася.
Санкцыі супраць 4 чалавек будуць працягнутыя — гэта Віктар Шэйман, Уладзімер Навумаў, Дзьмітры Паўлічэнка і Юры Сівакоў. Эўразьвяз кажа пра падазрэньні ў іх датычнасьці да зьнікненьня Віктара Ганчара, Анатоля Красоўскага, Юр’я Захаранкі і Зьмітра Завадзкага.
