Сярод патэнцыйных кандыдатаў на месцы дэпутатаў мясцовых саветаў, якіх выберуць 18 лютага, ёсьць і некалькі лідэраў дэмакратычных структураў. Гэта кіраўнік руху «За свабоду» Юрась Губарэвіч, лідэры грамадзянскай кампаніі «Гавары праўду» Андрэй Дзьмітрыеў і Тацяна Караткевіч, старшыня партыі БНФ Рыгор Кастусёў.
Свабода пацікавілася іх асабістымі плянамі і справамі ў структурах.
Губарэвіч: «Галоўная праблема ў акрузе — ушчыльненьне і забудова двароў»
Лідэр руху «За свабоду» адзначае, што ўсе ініцыятыўныя групы руху былі зарэгістраваныя.
«Фактычна ўсе нашы ініцыятыўныя групы завяршылі збор подпісаў, цяпер яны падводзяць вынікі. Магчыма, выставім яшчэ некалькі пікетаў, пройдземся па кватэрах, паколькі заканадаўства дазваляе рабіць гэта да 8 студзеня», — кажа Юрась Губарэвіч.
Што тычыцца асабістага вылучэньня лідэра руху, то ён балятуецца ў дэпутаты менскага гарсавету па Акадэмічнай выбарчай акрузе.
«Я сам сабраў 50 подпісаў, пасьля чаго перадаў справу сваім сябрам, бо трэба было праехаць па рэгіёнах, каб падтрымаць нашых актывістаў. Галоўная праблема ў маёй акрузе — ушчыльненьне і забудова дваровых тэрыторыяў. Таму я актыўна працую над гэтай актуальнай тэмай», — кажа палітык.
У Акадэмічнай акрузе зарэгістравана 8 ініцыятыўных груп. Сярод іх групы дзейнага дэпутата, дырэктара басэйна Сяргея Казлова з сацыяльна-спартовай партыі, і сакратара ЦК партыі левых «Справядлівы сьвет» Валерыя Ўхналёва.
Юрась Губарэвіч таксама кажа, што каля 20 прадстаўнікоў руху дэлегаваныя ў склад участковых выбарчых камісіяў. Але ўключылі іх туды ці не, пакуль невядома.
Дзьмітрыеў: «Чым старэйшыя людзі, тым часьцей яны гавораць пра амалоджваньне ўлады»
Адзін зь лідэраў «Гавары праўду» Андрэй Дзьмітрыеў балятуецца ў менскі абласны савет па Фаніпальскай акрузе. Ён кажа, што ягоная група ўжо сабрала двайную норму подпісаў — 300 пры неабходных 150.
«Мы зрабілі такі трайны бутэрброд. На тэрыторыі маёй абласной акругі балятуюцца яшчэ два актывісты „Гавары праўду“: Вольга Тамукевіч і Аляксей Сырамолатаў. Таму мы падтрымліваем адно аднаго і агітуем за ўсіх траіх. Гэта сябе апраўдвае», — лічыць Андрэй Дзьмітрыеў.
Спадар Дзьмітрыеў як лідэр кампаніі езьдзіць і па іншых акругах, дзе балятуюцца актывісты «Гавары праўду».
«Зьбіралі ўчора подпісы ў пасёлку Новы Узьдзенскага раёну. Ёсьць цікавая тэндэнцыя: чым старэйшыя людзі, тым часьцей яны гавораць, што трэба амалоджваць уладу. Кажуць, што надакучвае, калі паўсюдна адны і тыя ж твары», — распавядае Андрэй Дзьмітрыеў.
Караткевіч: «Некаторыя актывісты балятуюцца адразу ў некалькіх акругах»
Яшчэ адзін лідэр грамадзянскай кампаніі «Гавары праўду», Тацяна Караткевіч, кажа пра агульную сытуацыю.
«У нас 169 патэнцыйных кандыдатаў у дэпутаты, але 182 ініцыятыўныя групы. Лічбавая розьніца тлумачыцца тым, што некаторыя актывісты балятуюцца адразу ў саветы некалькіх узроўняў: абласны, раённы, сельскі. Чатыром групам улады ў рэгістрацыі адмовілі. Але гэтыя людзі не выключыліся з кампаніі, яны перайшлі ў каманды іншых прэтэндэнтаў», — тлумачыць Тацяна Караткевіч.
Сама спадарыня Караткевіч зьбірае подпісы ў Заслаўскай выбарчай акрузе, што ў Цэнтральным раёне Менску. У яе акрузе чатыры ініцыятыўныя групы.
Кастусёў: «Улады сарвалі наш экспэрымэнт»
Старшыня партыі БНФ Рыгор Кастусёў кажа, што «навіна сёньняшняга дня» — зрыў уладамі спробы адсачыць выбарчы працэс у дзьвюх акругах.
«Два нашы прэтэндэнты — Мікіта Краснакуцкі зь Менску і Ільля Дабратвор з Менскага раёну — падалі заяўкі, каб іх актывістаў уключылі ў склад участковых выбарчых камісіяў. У кожнай акрузе па сем участкаў, і яны спадзяваліся, што здолеюць „закрыць“ кожны. Сёньня даведаліся: ніводную нашу кандыдатуру не зацьвердзілі, — кажа Рыгор Кастусёў. — Нічога, на жаль, не мяняецца. Стаўленьне ўладаў да апазыцыі яшчэ горшае, чым падчас ранейшых выбараў».
Партыя БНФ зарэгістравала 30 ініцыятыўных груп. Яшчэ некалькі актывістаў зьбіраюцца рэгістравацца ад партыі, ім подпісы выбарнікаў не патрэбны.
Рыгор Кастусёў на гэтым тыдні перадае дакумэнты для рэгістрацыі яго кандыдатам у Магілёўскі абласны савет па Шклоўскай выбарчай акрузе. Пакуль у яго два канкурэнты — рэдактар раённай газэты і лекар зь мясцовага шпіталя.
