Заснавальнік сайту Wikileaks Джуліян Асанж абвясьціў ўзнагароду 20 тысяч эўра за любую інфармацыю, якая дапаможа знайсьці арганізатараў і выканаўцаў забойства мальтыйскай журналісткі Дафнэ Каруаны Галіцыі, якая на падставе «Панамскага архіву» вінаваціла ў карупцыі сям’ю прэм’ер-міністра краіны Джозэфа Муската. Пра гэта Асанж напісаў у твітэры.
53-гадовая журналістка і блогерка загінула напярэдадні ў выніку выбуху аўтамабіля. Экспэрты выказалі здагадку аб выбуху бомбы з дыстанцыйным кіраваньнем. За некалькі дзён да гібелі журналістка паведаміла паліцыі пра пагрозы на сваёй адрас, піша The Times of Malta.
Міжнародны кансорцыюм журналістаў-расьсьледнікаў летась апублікаваў так званы «Панамскі архіў» — дадзеныя аб карупцыі ў найвышэйшых эшалёнах улады ў некалькіх краінах сьвету. Каруана Галіцыя на падставе гэтых дакумэнтаў заявіла, што жонка прэм’ер-міністра Мальты, як мяркуецца, валодае афшорнай кампаніяй, якая атрымлівала грошы ад уладаў Азэрбайджану.
У верасьні міжнародны Цэнтар дасьледаваньня карупцыі і арганізаванай злачыннасьці апублікаваў даклад, згодна зь якім улады Азэрбайджану празь фіктыўныя кампаніі ў Вялікабрытаніі «адмылі» амаль 3 мільярды даляраў. Гэтыя грошы былі выдаткаваныя, у прыватнасьці, на хабары эўрапейскім палітыкам, якія лабіравалі інтарэсы Азэрбайджану ў Эўразьвязе і блякавалі рэзалюцыі, якія асуджаюць парушэньні правоў чалавека ў краіне.
***
