Аляксандар Лукашэнка ладзіць 29-30 чэрвеня афіцыйны візыт у Расею, дзе ў яго заплянаваная сустрэча з Уладзімірам Пуціным і ўдзел у паседжаньні Вышэйшага дзяржаўнага савету так званай «Саюзнай дзяржавы», а таксама чацьвёртым форуме рэгіёнаў Беларусі і Расеі.
Беларусь-Расея: сваркі і пацалункі
Папярэдняя сустрэча Лукашэнкі і Пуціна прайшла 3 красавіка ў Санкт-Пецярбургу. Тады кіраўнікі Беларусі і Расеі дамовіліся пра газ і рэфінансаваньне запазычанасьцей, стасункі з ЗША і Эўразьвязам. Сустрэча прайшла нягледзячы на тое, што перад яе пачаткам адбыўся тэракт у піцерскім мэтро — Пуцін, седзячы побач з Лукашэнкам, выказаў спачуваньні пацярпелым і працягнуў сустрэчу.
Пра гандлёвыя войны
У пытаньнях, што плянуецца абмеркаваць, прэс-служба Лукашэнкі называе найперш эканоміку і гандаль. А з гэтым праблемы: паводле Белстату, ужо пяць год запар таваразварот між Беларусьсю і Расеяй падае, у цэлым ён зьменшыўся на 40%. Калі ў 2012 годзе экспарт зь Беларусі ў Расею склаў 16,3 млрд даляраў ЗША, і імпарт — 27,5 млрд, то за 2016 Белаурсь прадала ў Расею на 10,8 млрд, а імпартавала — на 15,3 млрд даляраў.
Топ-10 незвычайных тавараў, якія Беларусь купляе і прадае Расеі
Сярод анансаваных пытаньняў — нарошчваньне двухбаковай супрацы ў аграпрамысловасьці і машынабудаваньні. Але з апошнім нешта ня так: беларускі МАЗ, паводле расейскага «Аўтастату», у траўні адкаціўся ў Расеі з 4-га на 9-е месца ў долі рынку, адстаў ад Scania, Mercedes-Benz, Isuzu, DAF і MAN.
Але сярод пытаньняў не анансуецца абмеркаваньне «харчовых войнаў» — а на іх Лукашэнка ў траўні наракаў губэрнатару Растоўскай вобласьці. Не падобна, каб скаргі дапамаглі: з моманту сустрэчы Рассельгаснагляд забараніў пастаўкі з шэрагу беларускіх малочных і мясных прадпрыемстваў, потым іх «амніставаў», але прадставіў «чорны сьпіс» з тых, каму не давярае. Акрамя таго, Расея ня раз выказвала сумневы ў паходжаньні, напрыклад, «беларускіх крэвэтак» або «беларускай папаі». Мінсельгасхарч Беларусі падазрае Расею ў несумленнай гульні, а МУС Беларусі правярае кіраўніка Рассельгаснагляду Сяргея Данкверта.
Пра расейскія танкі
Таксама плянуецца, што Лукашэнка возьме ўдзел у абмеркаваньні выкананьня расейска-беларускай «Праграмы ўзгодненых дзеяньняў у замежнай палітыцы». Падобна, што з узгодненасьцю дзеяньняў асаблівых праблемаў не агучвалася, але праз гэтую ўзгодненасьць турбуюцца суседзі Беларусі.
Ці пагражаюць расейска-беларускія вучэньні «Захад-2017» незалежнасьці Беларусі?
Прэзыдэнтка Літвы, намякаючы на беларуска-расейскія вучэньні «Захад-2017», назвала «выкарыстаньне тэрыторыі Беларусі для розных экспэрымэнтаў і небясьпечных гульняў» ў ліку пагрозаў сваёй краіне. Раней міністар абароны Эстоніі заяўляў, што вучэньні могуць стаць «квітком у адзін бок» у Беларусь для расейскіх вайскоўцаў.
Пра тое самае Свабодзе казаў міністар замежных спраў Латвіі: «Мы маем асьцярогі, што расейскія войскі, якія ўвойдуць у Беларусь, могуць не пайсьці [адтуль]». Амбасадар Украіны ў Беларусі крыху пакрытыкаваў іншыя беларуска-расейскія вучэньні «Славянскае братэрства-2017», а яго за гэта выклікалі ў беларускі МЗС.
