У чэрвені 2002 году Васіль Уладзімеравіч Быкаў разам з жонкай Ірынай Міхайлаўнай наведалі Прагу. Быкаў начытаў перад мікрафонам Радыё Свабода фрагмэнты сваіх успамінаў – 40 фрагмэнтаў, агульныай працягласьцю 6 гадзін 22 хвіліны. Пазьней ён іх пашырыў, і яны выйшлі асобнай кнігай пад сёньня добра ўсім вядомым назовам “Доўгая дарога дадому”. У тыя ж дні у чэрвені 2002-га супрацоўнікі Свабоды папрасілі Быкава запісаць урыўкі ягонай прозы. Васіль Уладзімеравіч выбраў са збору твораў некалькі фрагмэнтаў, і сёньня вы можаце пачуць іх у аўтарскім выкананьні.