Амаль 2-хвілінны ролік на ангельскай мове «Дарогамі штэтлаў» пачынаецца ад габрэйскай прыпавесьці.
«Аднойчы я сустрэў мудраца і спытаўся ў яго: ці мог бы ты патлумачыць, навошта я жыву на гэтым сьвеце? Навошта я раблю добрыя і кепскія рэчы? Мудрэц усьміхнуўся: раней ці пазьней кожны задае гэтае пытаньне і яны павінны знайсьці адказ самі. Але дзеля гэтага яны павінны прайсьці свой уласны шлях. І я распачаў сваё падарожжа. Я прайшоў шмат дарог. Я сустрэў шмат людзей. Я вывучаў лёгкія і складаныя тэксты сьвятых кнігаў. Напрыканцы свайго падарожжа я ізноў прыйшоў да мудраца і сказаў: я знайшоў вельмі шмат адказаў на сваё пытаньне, але каторы зь іх слушны? Мудрэц адказаў: — Усе. Шлях да Бога няпросты. Гэта ўсё, што ты сустракаеш на сваіх шляху».
Далей у роліку беларускія краявіды чаргаюцца з выявамі артадаксальных габрэяў, гучыць клезмэрская музыка.
Упершыню пра габрэяў на беларускіх землях у пісьмовых крыніцах узгадваецца ў 14 стагодзьдзі. Паводле перапісу 1897 году на тэрыторыі сёньняшняй Беларусі пражывала больш 900 тысяч габрэяў альбо 14% ад агульнай колькасьці насельніцтва. Яны былі другой пасьля беларусаў этнічнай групай. У беларускіх гарадах габрэі складалі да паловы насельніцтва, а ў мястэчках да 80% і болей.
