На двух участках у Менску перамагла кандыдатка ад АГП, а Караткевіч прайграла
На двух участках 97-й акругі, дзе балятуецца кандыдатка ў прэзыдэнты на выбарах-2015 Тацяна Караткевіч («Гавары праўду»), перамагла кандыдатка ад АГП Ганна Канапацкая.
На гэтых участках ёй таксама прайграе начальнік станцыі «Менск-Пасажырскі» Аляксандар Дрожжа, якога незалежныя СМІ называлі кандыдатам ад улады і імаверным пераможцам.
Адным здымкам падзяліўся назіральнік Ягор Бурбо. На ягоным участку № 221 сьледам за Канапацкай ідзе Дрожжа, а Караткевіч толькі на трэцім месцы.
Зьвесткі па іншым участку публікуе ў Twitter назіральніца з «Моладзі БНФ» Наста Байко. На яе ўчастку № 205 першае месца мае Канапацкая, другое — Караткевіч, трэцяе — Дрожжа. Прычым тут нешта ня так з датэрміновым галасаваньнем: яшчэ зранку пісалася, што датэрмінова прагаласавалі 169 чалавек, цяпер раптам 501.
Канапацкая пакуль адмаўляецца камэнтаваць гэтую інфармацыю і прапануе пачакаць афіцыйных вынікаў.
Цс-с-с-с!
На ўчастку №584 ва Ўсходняй выбарчай акрузе №107 назіральніцу пазбавілі акрэдытацыі, матываваўшы гэта тым, што ў яе занадта шмат скаргаў і імі яна адцягвае старшыню ад працы, паведамляе Electby. На ўчастку не засталося ніводнага назіральніка.
Яшчэ на адным участку перамагае кандыдатка АГП
Пры чым на гэты раз нешта ня так з датэрміновым галасаваньнем: яшчэ зранку пісалася, што датэрмінова прагаласавала 169 чалавек, цяпер раптам 501.
На першым месцы Ганна Канапацкая (АГП), на другім Тацяна Караткевіч («Гавары Праўду»), на трэцім — Аляксандар Дрожжа (якога незалежныя СМІ называлі верагодным пераможцам).
Навасяд зьдзіўлены: дыплямат Варанецкі стаў дэпутатам пры 35%-й яўцы?
Неафіцыйнай інфармацыяй са Свабодай падзяліўся кандыдат па Сьвіслацкай акрузе ў Менску Ўладзімер Навасяд:
«У мяне ёсьць неафіцыйныя дадзеныя. Гэта тое, што сабралі мае назіральнікі на розных участках. Атрымліваецца, што ў акрузе перамог амбасадар Беларусі ў Аўстрыі спадар Варанецкі. На другім месцы — першы намесьнік старшыні Лібэральна-дэмакратычнай партыі Алег Гайдукевіч. У мяне — трэцяе месца.
Мы зараз рыхтуем скаргі. Дзіўная сытуацыя. Назіральнікі адсочвалі на адным участку і датэрміновае, і асноўнае галасаваньне. І нібыта ўсё больш-менш супадала з афіцыйнымі дадзенымі. А цяпер невядома адкуль зьявіліся 500 бюлетэняў. І амаль усе прагаласавалі за Варанецкага.
Але нават ня ў гэтым справа. Мы ўважліва адсочвалі колькасьць выбарнікаў, якія прыйшлі на ўчасткі. Налічылі толькі 35%. А каб выбары адбыліся, патрэбна яўка паловы выбарнікаў плюс яшчэ аднаго. Так што, мы лічым, у нашай акрузе выбары не адбыліся. Значыць, і дэпутата няма».
Паводле афіцыйных зьвестак яўка ў гэтай акрузе склала 60 працэнтаў.
Лябедзьку выдалілі з выбарчага ўчастку
Старшыню АГП Анатоля Лябедзькі, які зьяўляецца даверанай асобай кандыдата ў дэпутаты Вольгі Маёрава па Ўсходняй выбарчай акрузе № 107, выдалілі з выбарчага ўчастку № 598. «Ён ня вытрымаў нахабства камісіі, якая адмаўлялася паказваць тоўсьценькую пачку «супраць усіх», кажучы, што там тры бюлетэні. «А дайце я сам пагляджу, — адсунуў стол лідэр АГП і накіраваўся да камісіі. — Стаяць, анямелі, рукі дрыжаць, іх трасе...», — цытуе Лябедзьку прэс-служба АГП.
Выбары адбыліся, яўка склала 74,32% — ЦВК
Паводле зьвестак ЦВК на 22:30, яўка на выбарах у Палату прадстаўнікоў склала 74,32%. Найбольшая яўка паводле ЦВК назіралася ў Магілёўскай вобласьці (80,9%), найменшая — у Менску (61,11%), а за межамі Беларусі прагаласавала 66,12%.
Лічбы яўкі практычна не зьмяніліся з мінулых выбараў: у 2012 годзе яўка складала 74,3% (59,2% у Менску). Блізкія лічбы былі і ў 2008 годзе, калі яўка склала 76,7%.
Будзе дэпутат ад АГП?
Па зьвестках назіральніка Ягора Бурбо, на адным з участкаў 97-й акругі перамагае кандыдатка ад АГП Ганна Канапацкая. Сьледам за ёй начальнік станцыі «Менск-Пасажырскі» Аляксандар Дрожжа, якога незалежныя СМІ называлі верагодным пераможцам. А на трэцім месцы — кандыдатка ў прэзыдэнты на выбарах-2015 Тацяна Караткевіч («Гавары Праўду»).
Заўважым, што гэта толькі адзін участак з акругі — гэта яшчэ ня значыць перамогу.
Падлік галасоў на 347-м участку
Назіральнік кампаніі «Права выбару» Сяргей Казлоўскі заяўляе, што 11 верасьня з 11 да 13 гадзіны на Свіслацкай выбарчай акрузе № 94 назіралася небывалая актыўнасьць «карусэльшчыкаў».
Жанчыны, пераважна настаўніцы, курсіравалі групамі па 6–8 чалавек паміж школай № 129 (участкі № 106 і № 107), гімназіяй № 28 (участкі №№ 108–110), школай № 123 (участкі №№ 111–113). Каля школ жанчыны дзяліліся на групы па двое і ішлі галасаваць. Бюлетэні атрымлівалі ў сябраў камісіяў з таго боку стала, што далей ад назіральнікаў.
Крыху пазьней назіральнікі «Права выбару-2016» зафіксавалі тых жа жанчын на другім баку Серабранкі — каля сярэдняй школы № 134, дзе ўчасткі №№ 124–126.
«Да 11 гадзіны на ўчастках галасавала па 30–40 чалавек, а з 11 раніцы да 13 гадзіны, калі запусьцілі карусэль, на ўчастках дадалося недзе па сотні галасоў. А ў 15:00 на ўчастках, нягледзячы на тое, што тут гучаць песьні, наліваюць сьпіртное, выязны гандаль — людзей амаль няма», — цытуе Сяргея Казлоўскага прэс-служба кампаніі «Права выбару».
У інфацэнтр зазірнулі карэйскія назіральнікі. З Паўднёвай ці Паўночнай Карэі. Супрацоўнік: Паглядзіце на іх.#выбары https://t.co/8XGT9EqPJc
— Радыё Свабода (@svaboda) 11.9.2016
Яўку па Беларусі старшыня ЦВК Ярмошына абазначыла як 67,7 працэнтаў і сказала, што спадзяецца ў 24:00 паведаміць пра вынікі выбараў па большасьці з 110 акругаў.
Трусаў: «У Менску страшэнная праблема зь яўкай»
Старшыня Таварыства беларускай мовы Алег Трусаў, які быў дэпутатам Вярхоўнага Савету Беларусі 12 скліканьня, цяпер балятуецца ў Палату прадстаўнікоў шостага скліканьня.
Ён сказаў Свабодзе, што пакуль ня мае нават неафіцыйных дадзеных пра вынікі галасаваньня ў ягонай акрузе:
«Усё ж у нашай акрузе сем кандыдатаў. Гэта ня тры-чатыры, як у бальшыні іншых. Таму мяркую, што ў нас бюлетэні будуць лічыць даўжэй.
Я сёньня абышоў шмат участкаў. Пагутарыў са старшынямі і сябрамі камісіяў, выбарнікамі. Канечне, праблема яўкі ў Менску катастрафічная. Я і раней казаў, і сёньня пераканаўся ў гэтым — у маёй акрузе, калі б не датэрміновае галасаваньне, 50% яўкі не было б. Гэта выразна бачна.
А ў іншых менскіх акругах яшчэ горш. Я ўсё ж вялікую працу зрабіў. Людзі ішлі за мяне галасаваць. Я зь імі размаўляў, і яны мне казалі пра гэта».
Цяпер усё зразумела
«Яшчэ ня вечар. Я ня ведаю, што будзе потым. Я думаю, што я сілкуюся вашай энэргіяй, як вампір», — адказала Лідзія Ярмошына на пытаньне журналіста аб тым, адкуль бярэ столькі сілаў.
Замежным назіральнікам паказваюць тое ж, што і беларускім:
Назіральнікі назіраюць, што могуць. Некаторыя паведамляюць, што бюлетэні пасьля падліку цяпер раскладаюць не па асобных стосах у адпаведнасьці з тым, за каго там голас, а ў адзін стос «падлічаных».
Давераную асобу Цярэшчанкі выгналі з участку
Удзельнік прэзыдэнцкай кампаніі Віктар Цярэшчанка сёлета балятуецца ў дэпутаты Палаты прадстаўнікоў па Старавіленскай выбарчай акрузе ў Менску.
Ён паведаміў Свабодзе, што сёньня ягоную давераную асобу выгналі з выбарчага ўчастку:
«Гэта здарылася зь Яўгенам Жумаджыкавым. Ён падышоў да старшыні ўчастковай камісіі ў Весьнянцы і папрасіў удакладніць агульную колькасьць выбарнікаў на ўчастку. Ніякай таямніцы ў гэтым няма. Наадварот, паводле заканадаўства, гэтую лічбу наагул павінны вывешваць на ўчастку. Старшыня яму нічога не адказаў, спаслаўшыся на занятасьць.
Праз 15 хвілін Яўген пабачыў, што старшыня ўчастковай камісіі нічым не займаецца, і зноў зьвярнуўся да яго з тым жа пытаньнем. У адказ пачуў, што ён перашкаджае працы камісіі. Яўгена выдалілі з участку. Такое самае адбылося сёньня яшчэ з адным маім актывістам».
Ярмошына: Выбары не былі квёлыя. Так, цікавіліся выбарамі ў Расеі, але сытуацыю пераламілі дзяржаўныя мэдыі.#выбары https://t.co/uXCTqWA5OQ
— Радыё Свабода (@svaboda) 11.9.2016
