Сьвяточныя мерапрыемствы, ініцыяваныя «Маладым фронтам» у рамках 25-й гадавіны абвяшчэньня незалежнасьці Беларусі, завяршыліся шэсьцем ад парку Янкі Купалы, дзе прайшлі літаратурныя чытаньні, да плошчы Незалежнасьці.
Менавіта тут, у будынку колішняга Вярхоўнага Савету, 25 жніўня 1991 году адбылася гістарычная падзея — Дэклярацыі аб сувэрэнітэце, ухваленай дэпутатамі парлямэнту 27 ліпеня 1990 году, быў нададзены статус закону.
Калі Зьміцер Дашкевіч прамовіў заключнае слова і засьпявалі гімн «Магутны Божа», невядомыя маладыя людзі запусьцілі ў актывістаў некалькі яек і кінуліся наўцёкі. Міліцыя ніяк не адрэагавала, хоць людзей у форме і ў цывільным вакол было ня меней, чым удзельнікаў сьвяточнай імпрэзы.
Купалаўскія чытаньні і шэсьце пад бел-чырвона-белымі сьцягамі да плошчы Незалежнасьці
25 гадоў таму Дэклярацыя Вярхоўнага Савету БССР аб дзяржаўным сувэрэнітэце Рэспублікі Беларусь атрымала статус канстытуцыйнага закону. У Менску прайшлі чытаньні і шэсьце, прысьвечаныя гэтай гадавіне.
