Гомельскі журналіст-фрылансэр Аляксей Атрошчанка, якога ў чэрвені міліцыя затрымлівала ў Лоеве разам з Кастусём Жукоўскім, атрымаў 1 ліпеня праз пошту два адміністрацыйныя пратаколы.
«Склаў гэтыя пратаколы ўчастковы інспэктар Лоеўскага РАУС Андрэй Хічоў. Наколькі можна было разабрацца ў мудрагелістым почырку ўчастковага, вінаваціць ён мяне ў абразе „службовых асоб дзяржаўнага органу пры выкананьні імі службовых абавязкаў, паўнамоцтваў..., здымаючы ўсё на відэаздымкі“. Даслоўна так. Выглядае, падчас відэаздымкі каля камбінату будматэрыялаў я яшчэ й нядобра выказваўся на адрас кіраўніцы спраў Лоеўскага райвыканкаму Ірыны Пастуховай і намесьніцы старшыні райвыканкаму па ідэалёгіі Натальлі Кавуравай», — паведаміў Службе маніторынгу ГА «БАЖ» Аляксей Атрошчанка.
Ён дадаў, што другі пратакол, складзены ўчастковым інспэктарам Хічовым, датычны ўжо «непадпарадкаваньня законным патрабаваньням начальніка міліцыі Ўладзімера Бухаўцова».
«Нібыта я адмаўляўся садзіцца ў службовы аўтамабіль, каб мяне везьлі ў РАУС дзеля складаньня пратаколу за абразу вышэйпамянёных чыноўніц. Відаць, чыноўніцы й выклікалі міліцыянтаў, бо затрымліваць нас з відэакамэрай прымчалі спачатку двое супрацоўнікаў ДАІ, а пасьля і сам начальнік міліцыі з двума памагатымі. Мне было заяўлена: „Вы парушаеце відэаздымку. Паехалі!“ Ну, і павялі».
Ехаць у райаддзел міліцыі супрацоўнікі ДАІ загадалі і Жукоўскаму — ён быў за рулём уласнай машыны. З Жукоўскім гутарыў намесьнік начальніка міліцыі Генадзь Маджара — справа дайшла да ўжываньня сілы і рукапрыкладзтва. На гэта Жукоўскі падаў заяву ў раённы аддзел Сьледчага камітэту, а таксама напісаў скаргу начальніку абласной міліцыі.
«Нас трымалі ў міліцыі амаль шэсьць гадзінаў, але пратаколаў не складалі. Цяпер іх дасылаюць пачкамі — пераводзяць стрэлкі на нас», — лічыць спадар Атрошчанка.
21 чэрвеня Кастусь Жукоўскі з Аляксеем Атрошчанкам здымалі ў Лоеве мясцовы камбінат будматэрыялаў, які знаходзіцца ў гаротным стане. Першымі да іх падʼехалі чыноўніцы з райвыканкаму, запатрабавалі дакумэнты.
«Жукоўскі паказаў ім пасьведчаньне рыбака-аматара. Чыноўніцы, відаць, пакрыўдзіліся і выклікалі міліцыю», — лічыць Аляксей Атрошчанка.
Міністар унутраных спраў Ігар Шуневіч публічна абяцаў «не пакінуць без увагі» інцыдэнт у Лоеве.
