Як паведаміла нашаму радыё консул Беларусі ў Чэхіі Ірына Штурма, у аўтобусе ехалі дзеці з бацькамі, яны вярталіся з экскурсійнай паездкі ў Прагу.
У выніку аварыі 11 дзяцей атрымалі раненьні. На месца прыбылі некалькі брыгад хуткай дапамогі, пажарныя і верталёт выратавальнай службы.
ДТЗ адбылося каля 11:00 мясцовага часу. Паводле папярэдняй вэрсіі паліцыі, кіроўца недаацаніў складанасьць умоў надвор’я, у краіне другі дзень сьнегапад, і занадта моцна разагнаўся.
«Турыстычны аўтобус зьехаў з трасы, якую на той момант блякавала аварыя, і пачаў аб’яжджаць шашой ніжэйшай катэгорыі. На пласьце разьмяклага сьнегу аўтобус занесла, і ён перакуліўся на правы бок на полі каля шашы», – сказала нашаму радыё Эва Прахаржава, прэсавы прадстаўнік паліцыі ў Нахадзе.
Спадарыня Прахаржава дадала, што тэст на ўжываньне алькаголю ў адносінах да двух кіроўцаў аўтобусу, які правяла паліцыя, даў адмоўны вынік.
«Пашкоджаньні атрымалі 11 дзяцей ва ўзросце ад 12 да 16 гадоў. Аднаго пятнаццацігадовага хлопчыка зь цяжкімі траўмамі верталётам даставілі ў шпіталь. Яшчэ адна дзяўчынка такога самага ўзросту атрымала раненьне сярэдняй ступені цяжкасьці. Астатнія дзеці абышліся лёгкімі ранамі», — распавёў прадстаўнік службы хуткай дапамогі Кралавэградзкага краю Чэхіі Іва Новак.
Усіх пасажыраў пажарныя перасадзілі ў службовы аўтобус, даставілі і разьмясьцілі ў пасёлку Горжычкі (Hořičky). Зь імі працуе псыхоляг. Стараста вёскі Горжычкі Ёзэф Качэр паведаміў нам, што турысты з аўтобуса былі змешчаныя ў аб'екце фэрмэрскай гаспадаркі Доланы (Dolany), дзе атрымалі прытулак, гарбату, ежу, цяпло. З Прагі па іх ужо выехаў аўтобус, магчыма яшчэ сёньня яны выедуць.
