Барак Абама абвясьціў, што прыняў такое рашэньне для скарачэньня масавых забойстваў, якія адбываюцца ў ЗША.
Прэзыдэнт ЗША Барак Абама абвясьціў аб узмацненьні жорсткасьці кантролю за абаротам агнястрэльнай зброі, продаж якой будзе дазволены толькі па спэцыяльных ліцэнзіях і пры ўмове правядзеньня абавязковай праверкі пакупніка.
Пра гэта Абама паведаміў у аўторак на сустрэчы ў Белым доме, на якой прысутнічалі ахвяры нападаў і іх сваякі. Абама абвясьціў, што прыняў такое рашэньне, каб зьменшыць колькасьць масавых забойстваў, якія адбываюцца ў ЗША. Абама адразу павітаў у Белым доме Марка Кэлі, мужа былой дэпутаткі Палаты прадстаўнікоў Кангрэсу ЗША Габрыэль Гіфардс, якая была цяжка параненая ў выніку ўзброенага нападу.
На цырымоніі прысутнічалі жонка сьвятара Клемента Пінкні, забітага падчас нападу на царкву ў горадзе Чарльстан ў 2015 годзе — Джэніфэр, генэрал-лейтэнант ВПС ЗША ў адстаўцы Пітэр Рыд, чыя дачка Мэры была забітая падчас стральбы ў тэхналягічным унівэрсытэце Вірджыніі ў 2007 годзе, Джымі Грын, бацька Аны Грэйс, забітай падчас страляніны ў 2012 годзе ў сярэдняй школе Сэндзі Хук, Даніэль Хернандэз, які дапамог выратаваць жыцьцё члену кангрэса ЗША Габрыэль Гіфардс, калі яе абстралялі ў 2011 годзе ў Таксоне.
Па афіцыйных дадзеных, за апошнія 10 гадоў у ЗША ад агнястрэльнай зброі загінулі больш за 100 тысяч чалавек, аднак рэспубліканская большасьць у Кангрэсе, знаходзячыся пад ціскам ўплывовага «зброевага лобі», адмаўляецца прыняць заканадаўства, якое абмяжоўвае гандаль вінтоўкамі і пісталетамі. У сувязі з гэтым большасьць захадаў, прапанаваных Абамам, будзе выкананая на аснове прэзыдэнцкіх указаў. Рэспубліканцы сустрэлі пачынаньне прэзыдэнта ЗША ў штыкі, абвінаваціўшы яго ў спробе абысьці Кангрэс пры вырашэньні важнай ўнутрыпалітычнай праблемы.
