Прэзыдэнт Беларусі Аляксандар Лукашэнка заклікаў Расею й Турэччыну пайсьці на саступкі і кампрамісы для згладжваньня сытуацыі. Пры гэтым ён назваў Расею «нашай», а Турэччыну — «сяброўскай нам» дзяржавай.
Пра гэта ён заявіў сёньня на Міжнароднай канфэрэнцыі «Палітыка нэўтралітэту: міжнароднае супрацоўніцтва ў імя міру, бясьпекі й разьвіцьця», якая праходзіць у Ашхабадзе, перадае карэспандэнт БЕЛТА.
«Памылкі ў гэтым бурлівым сьвеце непазьбежныя, і іх трэба не нагнятаць, а вырашаць. Прабачце мяне, гэта тычыцца і апошняга канфлікту паміж нашай Расеяй і сяброўскай нам Турэччынай», — сказаў Лукашэнка.
Ён адзначыў, што канфлікты ў адным рэгіёне звычайна прыводзяць да пагаршэньня міжнародных адносінаў ва ўсім сьвеце.
«Калі палыхне ў адной частцы сьвету, то імгненна адгукнецца і ў іншай. І калі мы дапусьцілі дзесьці памылкі, трэба ўмець іх прызнаваць».
