Іранічныя інтэрпрэтацыі «Пагоні» апублікаваў у сваім фэйсбуку беларускі блогер Ra Ha Chou.
У інтэрвію Радыё Свабода ён падкрэсьліў, што яму не падабаюцца цяперашнія афіцыйныя лягатыпы міністэрстваў, і таму ён вырашыў пафантазіраваць, як бы яно магло быць у будучыні. Галоўнай мэтай сваіх інтэрпрэтацыяў блогер лічыць папулярызацыю «Пагоні» як унівэрсальнага сымбалю.
«Пагоня — гэта весела і цікава», — адзначае блогер і не хавае, што хацеў таксама «патроліць» тых, хто супраць усялякіх інтэрпрэтацыяў «Пагоні».
Праз свае інтэрпрэтацыі блогер рызыкуе стаць фігурантам судовага працэсу. Справа ў тым, што месяц таму адзін з аўтараў «Пагоні» заявіў, што зьбіраецца судзіцца з шэрагам мастакоў і арганізацыяў за «плягіят» у дачыненьні да эталённай «Пагоні». Паводле Крукоўскага, «Пагоня» перастала быць дзяржаўным сымбалем і перайшла ў статус звычайнага малюнку, а значыць, знаходзіцца пад аховай аўтарскага права.
Яўген Кулік і Уладзімір Крукоўскі лічацца афіцыйнымі аўтарамі эталёну дзяржаўнага герба Беларусі зь 1991-га па 1995 год.
