Памочнік дзяржсакратара ЗША па справах Эўропы і Эўразіі Вікторыя Нуланд пацьвердзіла ў аўторак факт перакіданьня ў Данбас расейскай цяжкай ваеннай тэхнікі.
Нуланд выступіла ў камітэце па замежных справах Сэнату ЗША на слуханьнях па ўкраінскай палітыцы і супрацьстаяньню Расеі.
У Чорным моры ў аўторак пачаліся ваенна-марскія вучэньні НАТО.
У іх удзельнічаюць амэрыканскі ракетаносец Vicksburg і караблі шасьці саюзьнікаў — Турцыі, Румыніі, Баўгарыі, Канады, Нямеччыны і Італіі.
Прадстаўнік ВМС Баўгарыі заявіў, што ў пляне вучэньняў — адпрацоўка супрацьпаветранай і супрацьлодкавай абароны, баявых манэўраў буйных караблёў.
Паўночнаатлянтычны альянс ужо правёў сэрыю вучэньняў ва Усходняй Эўропе — у мэтах падтрымаць саюзныя краіны, занепакоеныя магчымымі агрэсіўнымі памкненьнямі Расеі — пасьля анэксіі ёю Крыма ў сакавіку 2014 года.
У панядзелак ЗША перакінулі ў Латвію каля 750 адзінак баявой тэхнікі — танкаў, бронемашын, верталётаў.
На мінулым тыдні Міністэрства абароны Расеі абвясьціла аб пачатку маштабных ваенных вучэньняў на поўдні краіны, а таксама ў далучаным Крыму і самаабвешчанай Рэспубліцы Абхазія.
