Журналістка Белапан Анастасія Лосіч на прэсавай канфэрэнцыі задала Аляксандру Лукашэнку пытаньне пра пашырэньне выкарыстаньня беларускай мовы:
«Ваша нядаўняя заява пра важнасьць беларускай мовы для разьвіцьця нацыі, а таксама словы міністра адукацыі пра тое, што ў будучым большасьць прадметаў будзе выкладацца па-беларуску, выклікала нейкую нэрвовую рэакцыю ў Расеі. Там ужо некаторыя кажуць пра дыскрымінацыю расейскай мовы ў Беларусі. Чаму такая рэакцыя ўзьнікла і што будзе рабіць дзяржава, каб пашыраць выкарыстаньне беларускай мовы?» — спытала журналістка.
Прапануем самае важнае з адказу Аляксандра Лукашэнкі:
Пытаньне мовы вырашана раз і назаўжды. Яно вырашана на рэфэрэндуме беларускага народа. У нас ёсьць дзьве родныя дзяржаўныя мовы: расейская і беларуская. Гэтая праблема закрытая, пакуль прэзыдэнтам беларускаму народу служыць... працуе Лукашэнка.
Хацець міністру ніхто не забароніць
Але як палітык, а міністар — гэта палітык, якога прызначыў прэзыдэнт, і калі ён пагадзіўся з гэтым прызначэньнем, ён мусіць рашэньні прэзыдэнта выконваць.
Беларуская мова адрозьнівае нас ад расейцаў
Калі ў Расеі нехта напружваецца, то гэта ня значыць, што кіраўніцтва Расеі ці расейскі народ так думае. Яны ж не напружваюцца наконт таго, што ў Татарстане ці ў Башкатарстане размаўляюць на татарскай, напрыклад, мове. Што чачэнцы ці інгушы размаўляюць на сваёй мове. І падтрымліваюць. І я падтрымліваю беларускую мову.
Чаму? Гэта тое, што адрозьнівае нас ад рускага чалавека, ад расіяніна. Гэта прыкмета нацыі. Калі няма ў цябе асаблівасьцяў, сваёй, беларускай мовы, то ты ня маеш гэтай прыкметы. І ты проста як расейскі чалавек. Ты рускі! А мы ж беларусы!
Хачу, каб мой малы ведаў беларускую мову
Мы павінны ведаць беларускую мову гэтаксама, як і расейскую. Гэта будзе найвялікшае дасягненьне беларуса. У мяне ёсьць малы, і я хачу, каб ён ведаў беларускую мову, як расейскую. Ну, яшчэ і ангельскую, як усясьветную. І ня думаю, што вы хочаце інакш. Так што я не хачу страціць гэта багацьце, гэты скарб. Гэта даражэйшае за крэдыты і мільярды.
Падзеі ва Ўкраіне пачаліся зь бязмозглай нацыянальнай палітыкі. Найперш з мовы
Калі ў Расеі нехта напружваецца наконт нейкай мяккай беларусізацыі, яшчэ нечага... Спыніцеся. Яшчэ раз кажу: гэтая праблема вырашаная. Аніводзін міністар, прэм’ер-міністар насуперак маім дзеяньням ня пойдуць.
Пада мной — рэфэрэндум беларускага народа, маё рашэньне грунтуецца на гэтым рэфэрэндуме. Я катэгарычна забараніў усялякі ціск па моўнай прыкмеце.
Вы ведаеце, з чаго пачаліся падзеі ва Ўкраіне? Зь бязмозглай нацыянальнай палітыкі. І найперш з мовы. Я ўмею рабіць высновы. Ды мне і ня трэба Ўкраіна, я і раней вызначыўся.
Нашы «нацмены» пасадзілі рускага чалавека на чамаданы
Я сёньня рады, што мне ўдалося скруціць галаву таму агалцеламу нацыяналізму, які быў на пачатку 90-х... Усе расейскія людзі... сядзелі на чамаданах. За што? За што нашы «нацмены» пасадзілі нашага рускага чалавека на чамаданы? І як вы вызначылі, што гэта рускі чалавек? Вы што, высмакталі зь яго кроў і вызначылі, дзе там расейская, а дзе беларуская?
Дык беларусы таму разумныя, талерантныя і мудрыя, што ў нас у жылах зьмяшана мора крывей. І найперш — расейца, украінца, паляка, габрэя і нават татараў.
Хто як хоча, той так і піша
У нас няма абавязаньня пісаць на той ці іншай мове: хто як хоча, той так і піша.
Я нічога не абараняю, але калі расейскую мову і беларускую пакласьці на шалі, то беларуская мова, вядома, не дацягвае. Я хачу, каб па-беларуску гаварылі гэтаксама, як па-расейску... Але я ня буду цкаваць людзей.
Ваша расейская мова — на Валагодчыне
Я Ўладзімеру Ўладзімеравічу адказваў, калі ён казаў: «Табе дзякуй за тое, што ў вас так з расейскай мовай». Я кажу: «Гэта ж наша расейская мова»... — «А дзе тады наша?» — «Ну, можа, на Валагодчыне».
Размаўляйце дома па-беларуску
Каб пашырыць беларускую мову, размаўляйце дома на беларускай мове... Так будзем пашыраць... Не хвалюйцеся, беларускую мову мы не забудзем...
