Выйшла новая кніга зьняволенага праваабаронцы Алеся Бяляцкага «Іртутнае срэбра жыцьця». Час яе прэзэнтацыі пакуль ня вызначаны.
Кніга цалкам напісаная Алесем Бяляцкім за кратамі і прысьвечаная падзеям 2010—2011 гадоў у Беларусі.
Новая кніга Алеся Бяляцкага
«Кніга адлюстроўвае два гады жыцьця Алеся і Праваабарончага цэнтра „Вясна“. Алесь пачаў яе пісаць у верасьні 2012 і скончыў у чэрвені 2013 году. Кніга складаецца з разьдзелаў, і кожны зь іх — гэта фактычна ліст Алеся, успамін пра нейкія падзеі гэтага пэрыяду. Я вельмі рада, што яна выйшла, і Алесь яе чакае. Фактычна гэта гісторыя жыцьця Алеся гэтага пэрыяду, гісторыя „Вясны“ і ўсяго праваабарончага сэктару і нават гісторыя ўсёй Беларусі ў гэтыя цяжкія гады», —апавяла «Свабодзе» сябра «Вясны» Тацяна Равяка.
У сакавіку 2013 года выйшла кніга Алеся Бяляцкага «Асьвечаныя беларушчынай», у якую ўвайшлі яго літаратуразнаўчыя артыкулы і эсэ.
Кіраўнік праваабарончага цэнтру «Вясна» Алесь Бяляцкі асуджаны на 4,5 гады турмы ў лістападзе 2011 году. Яго прызналі вінаватым у нясплаце падаткаў. Праваабаронца сваёй віны не прызнаў і заявіў, што ўсе грошы, атрыманыя на ягоныя рахункі, ішлі на праваабарончую дзейнасьць.
Падставай для крымінальнага перасьледу Бяляцкага стала інфармацыя пра банкаўскія рахункі, якую перадалі афіцыйнаму Менску Літва і Польшча.
Краіны Эўразьвязу, ЗША і міжнародныя праваабарончыя арганізацыі лічаць Бяляцкага палітвязьнем, а прысуд яму — палітычна матываваным. Яны патрабуюць ад уладаў Беларусі вызваліць праваабаронцу. У 2012 і 2013 гадах Алесь Бяляцкі быў намінаваны на Нобэлеўскую прэмію міру.
