Суды над удзельнікамі «Чарнобыльскага шляху»

Затрыманы Леанід Смоўж паведаміў , што ягонага сябру Мікалая Коласа моцна зьбілі ў міліцэйскім аўтамабілі.

Пачаўся працэс над Леанідам Смоўжам. Судзьдзя Лаўкова.

Судзьдзя Фёдарава разглядае адміністратыўныя пратаколы (артыкул 17.1 — дробнае хуліганства і 23.34 — удзел у несанкцыянаваным масавым мерапрыемстве) на Дзяніса Карнова. Супрацоўнікі міліцыі кажуць, што Карноў лаяўся, упіраўся і не хацеў ісьці ў міліцэйскі аўтамабіль. Справу Леаніда Смаўжа разглядае судзьдзя Лаўкова. У судзе і сябра Леаніда Смаўжа — Мікалай Колас. Пры затрыманьні яго зьбівалі ў мікрааўтобусе. Скардзіцца, што анямела рука, паведамляе Праваабарончы цэнтар «Вясна».

Сьведка Вольга Мікалайчык кажа, што яна ехала ў тралейбусе з Рубцовым і Коласам. Зь імі селі ў тралейбус шасьцёра «брытагаловых», якія накінуліся і жорстка пагрузілі Рубцова і Коласа ў міліцэйскі аўтамабіль.

У судзе абвешчаны перапынак, прысутным сказалі пакінуць памяшканьне. Францкевіча і Рубцова пакуль у суд не прывезьлі.

У суд прывезьлі Юрыя Рубцова аголенага па пояс. Зь яго зьнялі майку і ён выйшаў з міліцэйскай машыны ў адных нагавіцах. Таксама ў суд дастаўленыя Аляксандар Францкевіч і яшчэ адзін удзельнік шэсьця.

Частку затрыманых судзіць судзьдзя Кірыл Полулех.

Уладзімер Новікаў, грамадзянін Расеі, асуджаны на 15 сутак арышту за непадпарадкаваньне міліцыі і хуліганства.

Як паведаміў Леанід Смоўж, міліцыянты зьнялі з Юрыя Рубцова майку адразу пасьля затрыманьня і ўсю ноч трымалі яго без майкі ў холадзе ў камэры.

Былога актывіста «Маладога фронту» Дзяніса Карнова арыштавалі на 20 сутак. Яго таксама абвінавацілі ў хуліганстве і непадпарадкаваньні міліцыі. Ён кажа, што яго затрымалі на вуліцы Багдановіча, дзе ён апынуўся выпадкова.

Прадпрымальнік Мікола Колас з Дзяржынскага раёну заявіў у судзе, што пратакол на яго складалі пад катаваньнем, што яму не далі магчымасьці пазваніць дамоў, каб паведаміць, што ён затрыманы.

Колас запатрабаваў адваката.

Коласа судзіць Кірыл Палулех.

Валер Тамілін асуджаны 20 сутак арышту. Судзьдзя Марына Фёдарава.

Мікалай Колас арыштаваны на 15 сутак.

Аляксандар Стукін арыштаваны на 20 сутак.

Судзьдзя Кірыл Палулех пачаў судзіць Юрыя Рубцова.

Рубцова прывялі на суд без кашулі, у адных штанах.

Рубцоў адмовіўся, каб ягоную справу разглядалі ў кабінэце судзьдзі, бо працэс адкрыты.

Судзьдзя спыніў разгляд справы. Шукаюць залю.

Леанід Смоўж арыштаваны на 20 сутак.

Калі ён праходзіў па калідору, сказаў: «За што?! Ганьба гэтаму суду!»

Залю, каб судзіць Рубцова, не знайшлі.

Аднак ён не пагадзіўся, каб ягоную справу разглядалі ў кабінэце судзьдзі Палулеха.

Рубцоў кажа, што хоча, каб на судзе прысутнічалі ўсе ахвотныя.

Судзьдзя загадаў складаць на Рубцова пратакол за непавагу да судзьдзі.

Аляксандра Францкевіча арыштавалі на 25 сутак. 15 сутак яму далі за непадпарадкаваньне міліцыі і 10 — за нецэнзурную лаянку.

Супраць Францкевіча сьведчыў супрацоўнік спэцназу міліцыі Андрэй Кампаніец.

Кампаніец заявіў у судзе, што Францкевіч прыцягнуў увагу міліцыі — «стаяў, азіраўся, у яго бегалі вочы». Міліцыянты вырашылі праверыць дакумэнты, але Францкевіч ім у гэтым адмовіў.

Паводле Кампанійца, Францкевіч пагражаў міліцыянтам звальненьнем з МУС і «станавіўся ў баявую стойку».

У сваю чаргу, Францкевіч абверг паказаньні Кампанійца. Ён паведаміў, што 25 красавіка выйшаў з працы і накіроўваўся дамоў. У гэты момант яго затрымалі чацьвёра ў цывільным.

Францкевіч зьвязвае свой арышт зь візытам у Менск прэзыдэнта Расеі Ўладзімера Пуціна, а таксама з маючым адбыцца Чэмпіянатам сьвету па хакеі.

Пачаўся працэс над Рубцовым. Як той настойваў, у судовай залі. Але судзьдзя Кірыл Палулех нікога на паседжаньне не пусьціў. Фактычна разгляд справы адбываецца ў закрытым рэжыме.

На працэсе Рубцова сьведкай выступіла рэжысэрка і грамадзкая актывістка Вольга Мікалайчык. Яна бачыла, як Рубцова затрымлівалі на Валгаградзкай вуліцы.

Паводле міліцэйскага пратаколу яго затрымалі на вуліцы Сурганава ля рэстарацыі «Макдональдз».

Адвакат прывёз відэа з камэраў назіраньня «Макдональдса», зь якога вынікае, што нікога там не затрымлівалі.

Аднак судьдзя адмовіўся праглядаць відэа і дадаваць яго да матэрыялаў справы.

Міліцыянты кажуць, што Рубцова затрымлівалі бяз майкі, на якой напісана «Арыштуйце мяне — я супраць Лукашэнкі».

Судзьдзя цікавіўся ў Мікалайчык, ці была на Рубцову майка.

Мікалайчык засьведчыла ў судзе, што як толькі Рубцоў, Колас і Смоўж выйшлі з тралейбусу, на іх накінуліся людзі ў цывільным. Усіх траіх пасадзілі ў варанок, які перасьледваў тралейбус.