Беларускую дэлегацыю на саміце ў Вільні ўзначаліць Макей

28–29 лістапада 2013 ў Вільні адбудзецца трэці саміт ініцыятывы «Ўсходняе партнэрства» Эўразьвязу.

Беларускую дэлегацыю на Віленскім саміце ўзначаліць міністар замежных спраў Уладзімір Макей, які «прадставіць пазыцыю і падыходы Беларусі ў дачыненьні да «Ўсходняга партнэрства» і далейшага разьвіцьця гэтай ініцыятывы ў ходзе пленарнай дыскусіі 29 лістапада 2013»,— паведамляе прэсавая служба МЗС Беларусі.

У рамках саміту мяркуецца правядзеньне двухбаковых сустрэч кіраўніка беларускай дэлегацыі з прадстаўнікамі краін Эўразьвязу і краін-партнэраў, а таксама кіраўніцтва эўрапейскіх структур.

Напярэдадні саміту «Ўсходняга партнэрства» ў Вільні пройдзе другі бізнэс—форум Усходняга партнэрства, ініцыятарам стварэньня якога выступіла Рэспубліка Беларусь . Плянуецца, што Беларусь тут будзе прадстаўляць міністар эканомікі Мікалай Снапкоў.

Сямашка, Гайсёнак, Макей

Менскі палітоляг Андрэй Фёдараў пракамэнтаваў Свабодзе прызначэньне Ўладзімера Макея кіраўніком беларускай дэлегацыі на саміце «Ўсходняга партнэрства» ў Вільні:

«Гэты варыянт чакаўся. Тое, што першая асоба Беларусі ня будзе ўдзельнічаць у саміце, было практычна відавочна, паколькі ніякіх крокаў насустрач Эўразьвязу з боку афіцыйнага Менску не было зроблена. А пад Макея менавіта з-за гэтай паездкі часова прыпынілі візавыя санкцыі. Таму гэтага варта было чакаць.

Але хто б дэлегацыяй не кіраваў, баюся, што чакаць пазытыўных вынікаў для Беларусі на гэтым саміце не выпадае».

Палітоляг нагадаў, што саміт у Вільні стане трэцім. Дагэтуль яны праходзілі ў Празе, дзе беларускую дэлегацыю ачольваў першы віцэ-прэм’ер Уладзімер Сямашка, і ў Варшаве, дзе Беларусь прадстаўляў амбасадар у Польшчы Віктар Гайсёнак.