Зімоўскі: Людзі бягуць з БТ не праз палітыку

Днямі журналістка Інга Хрушчова, якую лічылі нефармальным лідэрам прэзыдэнцкага журналісцкага пулу, абвясьціла праз акаўнт у сацыяльнай сетцы Фэйсбук пра сыход зь Беларускага тэлебачаньня.

«Я сышла з БТ менавіта зь меркаваньняў маральных. І даўно ўжо не займаюся прапагандай. Чаго жадаю ўсім, хто думае, што палітыка — гэта нешта сьветлае і чыстае. У любым палітычным лягеры вас выкарыстоўваюць», — напісала на сваёй старонцы Інга Хрушчова.

«Яна была вядучай „Панарамы“, а вядучы ня ёсьць чыстым прапагандыстам, працуе з тэкстамі, — тлумачыць былы кіраўнік Белтэлерадыёкампаніі Аляксандар Зімоўскі. — Калі яна была рэпартэркай, дык была выдатнай, проста „каралева рэпартажу“. А калі працавала ў пуле, дык таксама гэта не прапаганда, бо пул атрымлівае ўказаньні ад іншых інстанцыяў. Яна не зьяўлялася прапагандысцкай у чыстым выглядзе».

На пытаньне, хто ж прапагандыст у чыстым выглядзе, Зімоўскі без ваганьняў адказвае «Я!»

«Я прапагандыст у чыстым выглядзе. Я казаў людзям, што пісаць, што гаварыць, і якія мусяць быць акцэнты».

Інга Хрушчова адпрацавала на тэлебачаньні амаль два дзясяткі гадоў. Яе твар і голас знаёмыя тэлегледачам зь сярэдзіны 90-х. Менавіта Хрушчова паведамляла пра ўсе падзеі, зьвязаныя з галоўнай асобай краіны. Тым ня менш Белтэлерадыёкампанія, якая была працадаўцам Хрушчовай, яе звальненьне камэнтаваць адмаўляецца.

Прадстаўніца прэс-службы Белтэлерадыёкампаніі:

«Мы не камэнтуем, калі хтосьці прыходзіць ці сыходзіць з працы. У нас за гэтыя гады ведаеце колькі чалавек сышло? Мы пра ўсіх мусім камэнтаваць? Афіцыйнага камэнтару наконт Хрушчовай ня будзе».

Стала вядома, што Інга Хрушчова звольнілася з БТ яшчэ тры месяцы таму. У журналісцкіх колах пагаворваюць, што прычынай стаў асабісты канфлікт з намесьнікам старшыні Белтэлерадыёкампаніі Маратам Маркавым. Аднак пацьвердзіць гэтую інфармацыю пакуль не ўяўляецца магчымым.

Сама Інга, ізноў жа праз сацыяльную сетку Фэйсбук, пракамэнтавала Радыё Свабода сваё звальненьне:

«Ведаеце, што самае галоўнае для таго, каб ісьці наперад? Трэба мяняць асяродзьдзе. Менавіта яно так моцна ўплывае на ўсё, што з табой адбываецца. Калі сьвежы гурок зьмясьціць у расол, празь нейкі час ён абавязкова стане салёным. І я зьмяніла асяродзьдзе. У мяне іншыя пляны».

Хрушчова не крывадушнічае, калі кажа, што даўно не займаецца прапагандай. Апошнія гады яна засяродзілася на спартовай тэматыцы.

Інга кажа, што паверыла ў моц інтэрнэт-тэхналёгіяў і некалькі гадоў вучылася ў заходніх інтэрнэт-маркетолягаў. Цяпер яна працуе кіраўнічым партнэрам на сайце AutoTuristam.ru. Сама апісвае сваю працу так:

«Я дапамагаю людзям атрымаць яркія ўражаньні ад самастойных падарожжаў і эканоміць грошы, перасоўваючыся на асабістым аўто».

Інфармацыя пра сыход Хрушчовай з БТ выклікала розгалас у СМІ. Умэнт былі згаданыя «гучныя» сыходы тэлезорак за апошнія гады: у 2011 сыйшоў з АНТ вядоўца ток-шоў «Выбар» Сяргей Дарафееў. Цяпер ён працуе ва Ўкраіне. На Пятым канале ў Санкт-Пецярбурзе працуе калісьці «лепшы вядучы інфармацыйных праграм» Юры Круглік. Дарэчы, як паведамляе сайт тэлеканала, там жа цяпер працуе і тэлевядучая Аліна Краўцова. Шукае працу ў Расеі і вядучы АНТ Аляксандр Аверкаў

«Людзі насамрэч бягуць зь дзяржаўных СМІ, але гэта больш кажа пра агульны стан беларускага тэлебачаньня. А не пра тое, што на тэлебчаньні ёсьць нейкія палітычныя калізіі ці бойкі на палітычнай арэне», — кажа Зімоўскі.

Сам ён працуе медыя-кансультантам у Расеі. У ідэях, якія яму даводзілася прапагандаваць пра афіцыйныя беларускія мэдыя, ён не расчараваны:

«Ідэя працуе. Дзяржава ўмацоўваецца. Ужо амаль 20 гадоў, як мы існуем па Канстытуцыі 1996 году. Я ня бачу падставаў гаварыць, што стала кепска. Эканоміка хістаецца, але да стану справаў, які быў у 1994 годзе, вельмі далёка».

Пакаленьне Хрушчовай — першае з журналісцкага прызыву новай улады. Менавіта гэтыя маладыя і амбітныя журналісты прыйшлі на зьмену знакамітай тэлегенэрацыі, створанай пры старшыні БТ Генадзю Бураўкіну. Эдуард Мельнікаў, які ў 1992–1994 быў галоўным рэдактарам грамадзка-палітычных праграм БТ, сыйшоў з тэлебачаньня яшчэ ўвесну 1995 году, пасьля майскага рэфэндума:

«Мне вельмі настойліва прапаноўвалі ўзначаліць АТН. Але тады ўжо было зразумела, да чаго гэта ўсё ідзе. Я сыйшоў, і пайшлі масавыя звальненьні людзей, якія мелі прынцыповую пазыцыю. Набіралі моладзь. Быў такі Ягор Рыбакоў (экс-старшыня Белтэлрадыёкампаніі, у 2005 асуджаны да 11 гадоў пазбаўленьня волі за хабар, вызвалены ў 2010 — рэд.), які казаў, што „нам ня трэба старыя кадры“. Бралі маладых, зь якіх можна было штосьці вылепіць».

Мельнікаў занепакоены ўвагай, якую надаюць незалежныя медыя выпадкам сыходу журналістаў з прадзяржаўных СМІ:

«Тры месяцы таму яна звольнілася, і толькі зараз яна ў фэйсбуку напісала гэтыя словы, за якія ўсе ўчапіліся. Значыць, ёй гэта чамусьці трэба. А незалежныя мэдыі дапамагаюць гэтым журналістам вылепіць сабе гэты новы твар. Чаму? На халеру гэта рабіць? Няхай яны сыходзяць у цень, куды хочуць».

Сама Інга Хрушчова ў камэнтары для Радыё Свабода падкрэсьліла, што адмыслова дзякуе за «актыўны ўдзел у рэрайце на тэму майго праекту».