Я апытаў на вуліцах гораду каля паўтара дзясятка гамельчукоў. Большасьць зь іх схілялася да думкі, што Каляды праваслаўныя вернікі і каталікі павінны адзначаць у розны час.
(Жанчына: ) “Яны сваё сьвята спраўляюць, а мы – сваё. У іх такая вера, у нас – такая. Так ужо павялося. Трэба было б разам адзначаць, але калі ўжо так пачалі, дык будзем так і заканчваць”.
(Мужчына: ) “Гэта ж вельмі добра, калі свая нацыя сьвяткуе ў свае дні. Гэта не ад нас – гэта ад нашых каранёў пайшло”.
(Жанчына: ) “Гэта па-старадаўняму: у кожнага свае законы, сваё сьвята. Традыцыя! Бог адзін, але кожны верыць у свайго Бога паасобку”.
(Мужчына: ) “Тут жа і каталікі жывуць, і праваслаўныя. Правільна!? Таму напачатку іхнае сьвята павінны адгуляць, як належыць, а пасьля і свае, як належыць”.
(Жанчына: ) “Мне падаецца, што сьвяткаваць трэба ў асобныя дні – іхныя і нашы. Закон такі! Ёсьць каталіцкае Ражаство і праваслаўнае”.
Пенсіянэр, які назваўся Іванам Іванавічам, веравызнаньне атаясамлівае з нацыянальнасьцю, і таксама за паасобнае сьвяткаваньне. Нават у сям’і:
(Іван: ) “Па-рознаму павінны адзначаць Нараджэньне Хрыстова. У мяне жонка – каталічка. Яна адзначае заўтра Каляды, а я – не. Я сам – беларус”.
Характэрна, што да сьвяткаваньня Калядаў у розны час схіляецца і большасьць маладых гамельчукоў. Моладзь пры гэтым спасылаецца на культуру і традыцыі.
(Дзяўчына: ) “Я лічу, што ў розны. Гэта ўжо традыцыя. Каталікі адзначаюць Нараджэньне Хрыстова 25 сьнежня, праваслаўныя – 7 студзеня. Гэта зьвязана з традыцыяй”.
(Дзяўчына: ) “У розны думаю. Каталікі – сабе, праваслаўныя – сабе. Культура розная ў нас”.
(Дзяўчына: ) “У розны! Каталікі – гэта адны людзі, праваслаўныя – другія. Розная вера”.
(Дзяўчына: ) “Бог адзін, а традыцыі – розныя, таму ў розныя дні і сьвяткаваць трэба”.
Некаторыя гамельсукі казалі, што паколькі Хрыстос адзін, то і сьвята Ягонага Нараджэньня павінна адзначацца ў адзін дзень.
(Жанчына: ) “У адзін дзень! Бог у нас адзін!”
(Жанчына: ) “Я хацела б, каб у адзін дзень сьвяткавалі. У мяне сваты – каталікі. Хацелася б, каб усё разам было. Трэба пост трымаць. Каталікі робяць гэта раней. Потым нам трэба пасьціцца, а яны ўжо скаромяцца. Хацелася б, каб адно было”.
