(эфір 19 жніўня)
Навіны культуры мінулага тыдня. Міністэрства культуры загадала "пакласьці на паліцу" дакумэнтальны фільм "Стагодзьдзе ХХ", які зьняў на Белвідэяцэнтры малады кінарэжысэр Андрэй Кудзіненка. Стужка распавядае пра канфлікты ў "гарачых кропках" і войны, у якіх брало ўдзел савецкае войска. Намесьнік міністра культуры ў справах кінематографу Юры Цьвяткоў забараніў фільм Кудзіненкі з даволі камічнай фармулёўкаю "за прапаганду пацыфізму й гвалту". Сёлета ў Менску будзе ўсталяваны чатырохмэтровы бронзавы помнік Тарасу Шаўчэнку, падараваны гораду Ўкраінай. Можна спадзявацца, што беларускія ўлады запрапануюць у адказ замовіць нашым разьбяром хай сабе й больш сьціплы помнік Уладзімеру Караткевічу і ўсталяваць яго ў Кіеве, дзе Караткевіч вучыўся ва ўнівэрсітэце. У Нацыянальнай мастацкай галярэі адчынілася выстава дзесяцёх мастакоў сярэдняга веку "Паўстагодзьдзя са стагодзьдзем". Усім яе ўдзельнікам – жывапісцу Мацьвею Басаву, аўтарцы габэленаў Тацяне Белавусавай ды іншым – сёлета споўнілася 50 гадоў. Столькі ж адсьвяткавала днямі і аўтарка канцэпцыі выставы, стваральніца першай у Беларусі мастацкай галярэі "Брама" Ларыса Фінкельштэйн. Выставу фундуе Амэрыканскі габрэйскі камітэт "Джойнт", хоць амаль усе яе ўдзельнікі – беларусы. Кінарэжысэрка Маргарыта Касымава днямі скончыла здымаць малабюджэтны мастацкі фільм "Зорка Вэнэра" паводле сцэнара Віктара Казько й вершаў Генадзя Бураўкіна. Стужка распавядае пра вясковых наркаманаў, якія лечацца ад сваёй хваробы малітвамі. Маргарыта Касымава спадзяецца паказаць "Зорку Вэнэру" на кінафэстывалі ў Таронта. Творчая майстэрня "Крэда", што дзеіць пры Наваполацкім унівэрсытэце, запрашае прыхільнікаў новых формаў мастацтва ўзяць удзел у фэстывалі альтэрнатыўных тэатраў, які пройдзе ў гарадзкім Доме культуры Наваполацку ў лістападзе. Апроч беларускіх, на фэсьце выступяць тэатральныя гурты з Польшчы, Летувы й Латвіі, а журы ўзначаліць былы мастацкі кіраўнік "Вольнае сцэны" Валеры Мазынскі. Моладзевы адукацыйны цэнтар "Fialta" пры падтрымцы Дзіцячага фонду ААН UNISEF ладзіць у летніках акцыю "Рукі ў абарону дзяцей". Чакаецца, што каля трох тысячаў беларускіх падлеткаў паставяць адбітак сваёй правай рукі на палатне памерам у 45 кв. мэтраў і такім чынам прагаласуюць за пашырэньне правоў дзіцяці й здаровы лад жыцьця. Падобныя акцыі пройдуць 1 верасьня ў некаторых школах. У канчатковым выглядзе калекцыя рук будзе дэманстравацца ў Менску 19 верасьня, у Міжнародны дзень міру.
