Менск, 1991 г. Вярхоўны Савет зь Беларускім Сьцягам і гэрбам “Пагоня” на фасадзе
Менгарвыканкам забараніў КХП БНФ адзначаць 27 ліпеня
27 ліпеня 1990 году Вярхоўны Савет БССР прыняў Дэклярацыю аб дзяржаўным сувэрэнітэце. Гэты дзень быў абвешчаны Днём незалежнасьці Беларусі. Цяперашнія ўлады адмянілі сьвята пасьля рэфэрэндуму 1996 году і прызначыла Дзень незалежнасьці на 3 ліпеня — дзень вызваленьня Менску ад гітлераўцаў.
Дэмакратычная грамадзкасьць па-ранейшаму прызнае Днём незалежнасьці Рэспублікі Беларусь 27 ліпеня і цягам многіх гадоў адзначае яго вулічнымі акцыямі, мітынгамі, творчымі вечарынамі і рознымі іншымі імпрэзамі. 22 гадавіну дзяржаўнага сувэрэнітэту Беларусі палітычныя партыі і рухі з розных прычынаў адзначаць не плянуюць.
Адна з прычынаў — забарона менскіх уладаў, распавёў Юрась Беленькі, адзін зь лідэраў КХП БНФ:
Юрась Беленькі
«Гарвыканкам адмовіў нам у задавальненьні заяўкі на правядзеньне мітынгу ў парку імя Янкі Купалы 27 ліпеня. Маўляў, у гэты дзень там заплянаваная прыборка тэрыторыі, санітарная апрацоўка помніка. У гэтым зьвязку я хацеў бы дадаць, што гарвыканкам і раней нам адмаўляў з падобнай фармулёўкай, але толькі ў Кіеўскім сквэры. Гэта сьведчыць пра тое, што адмову далі людзі, якія дэманстратыўна і цынічна не прымаюць нас, беларусаў. Бо 27 ліпеня — гэта дзень, калі была прынятая Дэклярацыя аб незалежнасьці нашай краіны. Ён быў абвешчаны сьвяточным днём — Днём незалежнасьці. Чужая ўлада адмяніла яго. Тым ня менш гэты дзень вельмі важны ў нашай гісторыі, і беларусам, якія пачуваюць сябе беларусамі, варта было б гэты дзень адзначыць у кожным разе. Гэта можа быць тэлефанаваньне сябру. Гэта можа быць творчая імпрэза ці нешта іншае. У кожным разе — гэта элемэнт супрацьстаяньня гэтай уладзе, якая гэтак цынічна зьдзекуецца з нашай гістарычнай памяці».
Старшыня Партыі БНФ Аляксей Янукевіч распавёў пра пляны сваёй партыі на 27 ліпеня:
Аляксей Янукевіч
«У свой час мы ладзілі рознага кшталту вулічныя мерапрыемствы. Сёлета вулічных масавых акцыяў мы не плянуем. Мы рэкамэндавалі ўсім тым нашым кандыдатам, чые ініцыятыўныя групы зарэгістраваныя, каб яны ў гэты дзень зьбіралі подпісы на вуліцах пад бел-чырвона-белымі сьцягамі. І гэта мае быць прымеркавана менавіта да гадавіны прыняцьця Дэклярацыі аб дзяржаўным сувэрэнітэце. А таксама каб у рэгіянальных структурах былі праведзеныя ўрачыстыя вечарыны. У нас у Менску таксама адбудзецца ўрачысты сход. Фактычна мы вырашылі, што фармат пікетаў пад бел-чырвона-белымі сьцягамі на сёньняшні момант — гэта аптымальны фармат».
