Дзьмітрыю Вусу прызначылі другую групу інваліднасьці
Былы кандыдат на прэзыдэнта Андрэй Саньнікаў адмаўляецца адбываць пакараньне ў Бабруйскай турме. Экс-кандыдату на прэзыдэнта Дзьмітрыю Вусу прызначылі другую групу інваліднасьці. Палітвязень Зьміцер Бандарэнка сустрэў чарговы дзень народзінаў за кратамі. Лідэра «Маладога фронту» Зьмітра Дашкевіча зьмясьцілі ў адзіночную камэру Глыбоцкай турмы, а ягоны паплечнік Эдуард Лобаў па-ранейшаму адмаўляецца пісаць прашэньне аб памілаваньні.
Экс-кандыдата на прэзыдэнта Андрэя Саньнікава цягам дня 29 верасьня могуць перавесьці з Магілёўскай у Бабруйскую турму. Аднак ён адмаўляецца ад этапаваньня, бо апасаецца, што знаходжаньне ў калёніі ў Бабруйску можа пагражаць ягонаму здароўю і жыцьцю. Пра гэта позна ўвечары паведаміў адвакат, кажа жонка палітвязьня Ірына Халіп:
«Позна ўвечары адвакат вярнуўся ад Андрэя з Магілёўскай турмы і паведаміў, што ён напісаў адпаведную заяву на імя начальніка турмы. Але калі яго будуць цягнуць, то, натуральна, ён нічога зрабіць ня зможа. Вось сёньня якраз усё і высьветліцца».
Лідэр «Маладога фронту» Зьміцер Дашкевіч пераведзены з Горак у Глыбокае, дзе зьмешчаны ў камэры-адзіночцы. Пра гэта таксама паведаміў адвакат зьняволенага, кажа праваабаронца Наста Лойка:
«Сапраўды існавала пагроза ягонаму жыцьцю, бо адміністрацыя Горацкай турмы пайшла на тое, што настроіла супраць яго іншых зьняволеных. Таму яго і перавялі ў Глыбокае, дзе адразу зьмясьцілі ў адзіночную камэру. Ніякіх скаргаў на адміністрацыю Глыбоцкай турмы ён не выказваў. Гэткім чынам, будзем спадзявацца, што сытуацыя стабілізавалася, адвакат будзе яго наведваць і неяк лепш будзе».
Былога кандыдата на прэзыдэнта Дзьмітрыя Вуса перавялі з трэцяй на другую групу інваліднасьці. Ад пятніцы ён знаходзіцца ў турэмным шпіталі на вуліцы Валадарскага ў Менску, дзе зь ім сустрэўся адвакат, кажа жонка палітвязьня Яўгенія Вус:
«Яго цяпер вазілі на кампутарную тамаграму мозгу, незразумела чаму, бо Дзіма адчувае сябе больш-менш нармальна. Канваяваў яго сам начальнік турмы і галоўны доктар шпіталю. Сёньня доктар сказаў, што ніякіх зьменаў, пагаршэньня няма. Тады чаму даюць другую групу інваліднасьці? Як доўга ўсё гэта будзе працягвацца, невядома. Я сёньня хадзіла да начальніка СІЗА і прасіла: вы мне яго хоць здалёк пакажыце. Ён адмовіў катэгарычна — нельга і ўсё. Я яшчэ калі выходзіла, то сказала, што дасьць Бог — і ваша жонка яшчэ будзе хадзіць і гэтак жа прасіць».
Зусім няма вестак ад яшчэ аднаго былога кандыдата на прэзыдэнта Міколы Статкевіча. Апошняе тэлефанаваньне ад яго было 19 верасьня, паведаміў бацька палітвязьня Віктар Статкевіч:
«Ён сказаў мне толькі некалькі словаў, што калі да мяне прыйдуць, каб я не пісаў за яго ніякіх папераў. Сказаў, што патэлефануе мне 25-га раніцай. Я сядзеў чакаў, але ніякага тэлефанаваньня не было. Я вельмі хвалююся за ягонае жыцьцё — ці жывы ён там. Мне толькі вядома, што яму бярвеньнем руку прыціснула. Дык ня толькі руку, але і бок яшчэ. Я ўжо гэтулькі сьлёз выліў, што гэтыя сволачы патанулі б у іх».
Я ўжо гэтулькі сьлёз выліў, што гэтыя сволачы патанулі б у іх.
Свой чарговы дзень народзінаў палітвязень Зьміцер Бандарэнка сустракаў у турме напярэдадні. Жонка Вольга кажа, што ў гэты дзень яна атрымлівала віншаваньні замест мужа. А ён даслаў ліст, у якім выказвае заклапочанасьць лёсам Андрэя Саньнікава, кажа Вольга Бандарэнка:
«Ён у лістах мне пісаў пра Андрэя Саньнікава, бо адчуваў, што нешта дрэннае рыхтуецца. І калі яго і Зьмітра Дашкевіча пачалі пераводзіць, то ён і кажа, што я адчуваў — нешта дрэннае рыхтуецца, бо занадта ўсе заспакоіліся. Улады ніяк ня хочуць быць прыстойнымі — у ролю нягоднікаў як увайшлі, так і застаюцца ў ёй».
З Эдуардам Лобавым — паплечнікам Зьмітра Дашкевіча ў «Маладым фронце», які адбывае зьняволеньне ў турме «Ваўчыныя норы», таксама днямі сустрэўся адвакат, паведаміла маці палітвязьня Марына Лобава:
«Ён паведаміў, што наведвае рэлігійную суполку. Адвакат не ўдакладніла, якую — хутчэй за ўсё, праваслаўную, бо там праваслаўны храм будуецца. Хоць Эдуард і католік, але ксяндзоў у такія ўстановы не пускаюць, таму даводзіцца хадзіць у праваслаўныя. Зараз ад яго адсталі з прашэньнем аб памілаваньні, сказалі падумаць, што ёсьць такая магчымасьць. Канечне, ён і ня думае пісаць, бо ня лічыць сябе ні ў чым вінаватым».
Як паведаміла Марына Лобава, праз адваката Эдуард падае наглядную скаргу на судовае рашэньне аб сваім зьняволеньні. Разам са Зьмітром Дашкевічам, асуджаным на 2 гады, ён атрымаў 4 гады турмы за, нібыта, хуліганства. Палітвязьні не прызналі сябе вінаватымі і заявілі, што гэта была правакацыя спэцслужбаў напярэдадні прэзыдэнцкіх выбараў.
Дзьмітры Вус
Дзьмітры Вус
Нарадзіўся ў 1971 годзе ў Менску.
Юрыст, завочна скончыў Гарадзенскі ўнівэрсытэт па спэцыяльнасьці «Правазнаўства».
З 16 гадоў працаваў рабочым на заводзе «Інтэграл», пасьля будаўніком.
1999–2003 гг. Дэпутат Менскага гарсавету дэпутатаў.
2007 г. Таксама ішоў на дэпутата, але яго не зарэгістравалі.
2008 г. Вылучаўся на дэпутата ў Палату прадстаўнікоў.
2010 г. Удзельнічаў у мясцовых выбарах, але не прайшоў у Менгарсавет.
Ачольвае выдавецтва «Трывіюм».
Жанаты, мае двух сыноў.
Беспартыйны.
Андрэй Саньнікаў
Андрэй Саньнікаў
Нарадзіўся ў Менску 8 сакавіка 1954 года. Скончыў Менскі дзяржаўны інстытут замежных моваў, Дыпляматычную акадэмію Міністэрства замежных справаў СССР у Маскве. Валодае чатырма мовамі. Працаваў у Таварыстве дружбы з замежнымі краінамі, у сакратарыяце ААН у Нью-Йорку, быў дарадцам прадстаўніцтва Рэспублікі Беларусь у Швайцарыі.
У 1995-1996 гг. — намесьнік міністра замежных спраў Беларусі. Пакінуў гэтую пасаду ў лістападзе 1996 год на знак пратэсту супраць правядзеньня рэферэндуму. У лістападзе 1997 году стаў стваральнікам і міжнародным каардынатарам грамадзянскай ініцыятывы «Хартыя’97».
У 2008 годзе ініцыяваў грамадзянскую кампанію «Эўрапейская Беларусь».
Ляўрэат міжнароднай прэміі імя Бруна Крайскага ў галіне абароны правоў чалавека (2005 г.).
Кандыдат у прэзыдэнты Рэспублікі Беларусь на выбарах-2010.
Зьміцер Дашкевіч
Зьміцер Дашкевіч
Нарадзіўся 20 ліпеня 1981 г. у вёсцы Кушняры Івацэвіцкага раёну Берасьцейскай вобласьці. Да пяці гадоў жыў у Расеі на Далёкім Усходзе. Потым сям’я перабралася ў Старыя Дарогі. Там скончыў школу № 2. Вучыўся ў Гарадзенскім сельскагаспадарчым інстытуце. У 2001 годзе прыйшоў у "Малады фронт". Увосень 2001 г. быў адным з абаронцаў Курапатаў. Пазьней паступіў у Віленскі пэдагагічны ўнівэрсытэт на факультэт славістыкі. Быў абраны кіраўніком Менскай гарадзкой арганізацыі "Маладога фронту". Актыўны ўдзельнік і арганізатар масавых акцыяў і мерапрыемстваў. За сваю палітычную дзейнасьць неаднаразова прыцягваўся да адміністрацыйнай адказнасьці. У 2004 г. абраны старшынём "Маладога фронту".
Мікола Статкевіч
12 жніўня 1956 году Нарадзіўся ў вёсцы Лядна Слуцкага раёну Менскай вобласьці ў сям'і настаўнікаў.
1978 Скончыў Менскую вышэйшую інжынэрную зэнітна-ракетную вучэльню.
1986 Абараніў кандыдацкую дысэртацыю.
Працаваў выкладчыкам Менскай вышэйшай інжынэрнай зэнітна-ракетнай вучэльні.
Люты 1991 На знак пратэсту супраць падзей у Вільні выйшаў з КПСС.
1991 Сябра Цэнтральнай рады і выканаўчага камітэту Беларускай сацыял-дэмакратычнай партыі (Народная Грамада).
1995 Старшыня БСДП (НГ).
1991-1995 Стваральнік і кіраўнік Беларускага згуртаваньня вайскоўцаў.
2000 Удзельнічаў у выбарах у Палату прадстаўнікоў.
2005 Асуджаны на тры гады абмежаваньня волі за арганізацыю 18-19 кастрычніка 2004 году ў Менску вулічнай акцыі супраць афіцыйных вынікаў парлямэнцкіх выбараў і рэфэрэндуму. Па амністыі тэрмін абмежаваньня волі быў скарочаны на год.
Кіраўнік аргкамітэту ў справе стварэньня Беларускай сацыял-дэмакратычнай партыі (Народная Грамада).
2010 Статкевіч вылучаўся кандыдатам у прэзыдэнты. Пасьля пратэстаў на Плошчы яго арыштавалі і затым асудзілі да 6 гадоў з адбыцьцём тэрміну пакараньня на падставе ч. 1 арт. 293 Крымінальнага кодэксу (арганізацыя масавых беспарадкаў, якія суправаджаліся гвалтам над асобай, пагромамі, падпаламі, зьнішчэньнем маёмасьці і ўзброеным супрацівам прадстаўнікам улады). З тэрміну ён адседзеў 5 гадоў, катэгарычна адмовіўся пісаць на імя Лукашэнкі прашэньне аб памілаваньні, аднак усё адно выйшаў на волю пасьля ўказу апошняга.
2011 Адбываючы тэрмін зьняволеньня, Мікола Статкевіч узяў шлюб з Марынай Адамовіч. Дзьве ягоныя дачкі ад першага шлюбу жывуць у Нямеччыне.
2017 Статкевіча затрымліваюць і зьмяшчаюць у СІЗА перад Днём Волі.
31 траўня 2020 Статкевіча затрымалі па дарозе на выбарчы пікет Сьвятланы Ціханоўскай. Спачатку яго пакаралі адміністрацыйным арыштам на 15 сутак, да якіх пасьля дадалося яшчэ столькі ж. Аднак па адбыцьці гэтага тэрміну палітыка ня вызвалілі, а перавялі ў СІЗА № 1 Менска і выставілі абвінавачаньне паводле крымінальнага артыкулу 342. Ён зноў адмаўляецца пісаць Лукашэнку прашэньне на памілаваньне, называе яго ўзурпатарам і дыктатарам, вітае канвой на закрытым судзе ў Гомлі нацыянальным воклічам «Жыве Беларусь!».
Зьміцер Бандарэнка
Зьміцер Бандарэнка
Грамадзкі актывіст, сябра ГА «БАЖ». Нарадзіўся ў Менску 28 верасьня 1963 году.
У 1984 г. скончыў Інстытут фізычнай культуры.
У 1995–1996 гг. працаваў на незалежным Радыё 101.2 FM, зачыненым уладамі.
Адзін з заснавальнікаў грамадзянскай ініцыятывы «Хартыя-97», каардынатар грамадзянскай кампаніі «Эўрапейская Беларусь».
У часе прэзыдэнцкіх выбараў 2010 г. быў актывістам штабу кандыдата на прэзыдэнта Андрэя Саньнікава. Быў арыштаваны 20 сьнежня ва ўласнай кватэры і зьмешчаны ў СІЗА КДБ. Першапачаткова ў дачыненьні да яго было высунутае абвінавачваньне па арт. 293 КК (масавыя непарадкі), які прадугледжвае пакараньне да 15 гадоў пазбаўленьня волі, аднак 4 красавіка яно было перакваліфікавана на больш мяккае.
Зьміцер Бандарэнка абвінавачваецца па ч. 1 артыкулу 342 Крымінальнага кодэксу (арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх). Артыкул прадугледжвае пакараньне штрафам, або арыштам на тэрмін да шасьці месяцаў, ці абмежаваньнем волі на тэрмін да трох гадоў, або пазбаўленьнем волі на той жа тэрмін.
Эдуард Лобаў
Эдуард Лобаў
Нарадзіўся ў Менску ў 1988 г. З 8-га кляса марыў зьвязаць сваё жыцьцё з войскам. Служыў тэрміновую службу ў спэцназе. Тамсама, у войску, пазнаёміўся з маладафронтаўцам з Гомелю, дзякуючы якому далучыўся да "Маладога фронту". Быў абраны кіраўніком менскай гарадзкой арганізацыі МФ. Надалей цікавіцца ваеннай справай і марыць пра адраджэньне беларускага войска.
Затрыманы 18 сьнежня разам зь лідэрам МФ Зьмітром Дашкевічам, абвінавачаны ў хуліганстве. У Жодзінскім СІЗА за адмову сьведчыць супраць маладафронтаўцаў Эдуарда пагражалі перавесьці ў камэру, дзе зь ім жорстка расправяцца.
Нарадзіўся ў 1971 годзе ў Менску.
Нарадзіўся ў Менску 8 сакавіка 1954 года. Скончыў Менскі дзяржаўны інстытут замежных моваў, Дыпляматычную акадэмію Міністэрства замежных справаў СССР у Маскве. Валодае чатырма мовамі. Працаваў у Таварыстве дружбы з замежнымі краінамі, у сакратарыяце ААН у Нью-Йорку, быў дарадцам прадстаўніцтва Рэспублікі Беларусь у Швайцарыі.
Нарадзіўся 20 ліпеня 1981 г. у вёсцы Кушняры Івацэвіцкага раёну Берасьцейскай вобласьці. Да пяці гадоў жыў у Расеі на Далёкім Усходзе. Потым сям’я перабралася ў Старыя Дарогі. Там скончыў школу № 2. Вучыўся ў Гарадзенскім сельскагаспадарчым інстытуце. У 2001 годзе прыйшоў у "Малады фронт". Увосень 2001 г. быў адным з абаронцаў Курапатаў. Пазьней паступіў у Віленскі пэдагагічны ўнівэрсытэт на факультэт славістыкі. Быў абраны кіраўніком Менскай гарадзкой арганізацыі "Маладога фронту". Актыўны ўдзельнік і арганізатар масавых акцыяў і мерапрыемстваў. За сваю палітычную дзейнасьць неаднаразова прыцягваўся да адміністрацыйнай адказнасьці. У 2004 г. абраны старшынём "Маладога фронту".
Грамадзкі актывіст, сябра ГА «БАЖ». Нарадзіўся ў Менску 28 верасьня 1963 году.
Нарадзіўся ў Менску ў 1988 г. З 8-га кляса марыў зьвязаць сваё жыцьцё з войскам. Служыў тэрміновую службу ў спэцназе. Тамсама, у войску, пазнаёміўся з маладафронтаўцам з Гомелю, дзякуючы якому далучыўся да "Маладога фронту". Быў абраны кіраўніком менскай гарадзкой арганізацыі МФ. Надалей цікавіцца ваеннай справай і марыць пра адраджэньне беларускага войска.Я ўжо гэтулькі сьлёз выліў, што гэтыя сволачы патанулі б у іх.
