Міністэрства інфармацыі ня мае намеру адклікаць судовыя пазовы аб закрыцьці незалежных газэт

Міністэрства інфармацыі ня мае намеру адклікаць судовыя пазовы аб закрыцьці "Нашай нівы" і "Народнай волі", не зважаючы на пратэсты і просьбы чытачоў, якія гэтымі днямі паступаюць у міністэрства і публікуюцца на старонках газэт.

Пра гэта, адказваючы на пытаньне "Свабоды", паведаміла на брыфінгу для журналістаў намесьніца міністра інфармацыі Лілія Ананіч:

"Я думаю, што нашыя адносіны з "Народнай воляй" і "Нашай нівай" вырашацца ў судовых інстанцыях. На сёньняшні дзень судовы працэс распачаты, і кожны бок мае права выказаць свае меркаваньні. А права суду — прыняць адзінае, канчатковае і правільнае рашэньне. Давайце ня будзем прысьпешваць час.

Назіраючы апошнім часам за "Народнай воляй", я бачу, што больш публікацый цікавых. Можа, кожны таксама вынесе з гэтага нешта станоўчае ў тым сэнсе, што: а ці ўсё мы робім, калі ў дзяржавы ёсьць прэтэнзіі? Самае галоўнае — не парушаць заканадаўства і любіць сваю краіну. І любіць ня толькі так, як мы сабе ўяўляем, а зыходзячы з таго, што гэта твая краіна. І ўсе яе цяжкасьці — гэта твае цяжкасьці, усе яе посьпехі — твае посьпехі. Калі такі настрой будзе ў нашых выданьнях, то гэта цудоўна. Ну, а закон для ўсіх аднолькавы. І калі рэдакцыя задумаецца, што парушэньні ўсё ж ёсьць, то далей усё пойдзе яшчэ лепш і газэты будуць разьвівацца".