Міліцыянты спынялі яго на чатырох розных кантрольна-прапускных пунктах, калі ён спрабаваў прайсьці ў цэнтар гораду з фотаапаратам.
Паводле Сяргея Серабра, прычыны для забароны называліся розныя. У адным месцы яму сказалі, што ў яго завялікі фотаапарат. Маўляў, «з такімі вялікімі праходзіць нельга». Хоць у апублікаваным у мясцовых СМІ сьпісе забароненых прадметаў пра фотаапараты нічога ня сказана: паведамлялася толькі, што праз КПП ня пусьцяць са зброяй і напоямі ў непразрыстай тары, а таксама зь незарэгістраванай сымболікай.
На яшчэ адным КПП Сяргею Серабру сказалі, што ў яго няма акрэдытацыі. Чым дужа зьдзівілі: якая акрэдытацыя патрэбная, каб проста трапіць на вуліцу Леніна? Журналіста не прапусьцілі нават пасьля таго, як ён паказаў пасьведчаньне фотакарэспандэнта БелаПАН.
На апошнім КПП міліцыянты сказалі наўпрост: «Сяргей Васілевіч, вас загадана не прапускаць».
Сяргея Серабра ведаюць у горадзе перадусім як рэдактара незалежнага сайту «Народныя Навіны Віцебску», дзе пэрыядычна зьяўляюцца фатаздымкі апазыцыйных акцый. Чаму міліцыянты супраць таго, каб на сайце асьвятляліся дзяржаўныя сьвяты, Сяргей Серабро не разумее.
