Сто дзён Януковіча: Маятнік заграз у Крамлі

У дзень сваёй інаўгурацыі Віктар Януковіч абяцаў "Стабільнасьць і рэформы». Сёньня ж, праз сто дзён, мы бачым толькі падабенства стабільнасьці, дый тое – дзякуючы ўжо двойчы згвалтаванай Канстытуцыі. Абяцаныя ж рэформы аддаленыя самім Януковічам ўжо на год. Звярніце ўвагу, ніводная сур'ёзная сіла ў сьвеце, акрамя зробленай мімаходзь заявы Эўрапейскай народнай партыі, не асудзіла відавочных парушэньняў Канстытуцыі прэзыдэнтам Украіны. На Захадзе моляцца на Крэмль і радуюцца «пацяпленьню» адносінаў паміж Мядзьведзевым і Януковічам.

За рэкордна кароткі час Януковіч, як гвалтаўнік Канстытуцыі, засяродзіў у сваіх руках звышмагутны ўладны патэнцыял - у яго ў адміністрацыі сканцэнтравана ўся ўлада ў дзяржаве, ён кантралюе як парлямэнт, так і ўрад і Канстытуцыйны суд, Найвышэйшую раду юстыцыі і ўсе суды ў Украіне. Ад такой улады, якая будзе ўзмацняцца, вельмі цяжка адмовіцца ў далейшым. На гарызонце таксама зьмены ў Канстытуцыі Украіны, пад руку цяперашняй уладзе. Новы прэзыдэнт ужо адмераў сабе як мінімум 10 гадоў, г.зн. мінімум два тэрміны. Якраз харкаўскія пагадненьні з Масквой і прадугледжваюць панаваньне Януковіча на доўгія гады. Крэмль будзе страхаваць гэтага прэзыдэнта Ўкраіны ад любых непрыемнасьцяў. Заканамерна, што Віктар Януковіч імкнецца да расейскай мадэлі кіраваньня - аўтарытарызму, які ўжо сёньня палохае частку ўкраінскай кіруючай эліты, нават у шэрагах самога прэзыдэнта.

Віктар Януковіч здраджвае жаданьню большай часткі грамадзян Украіны, якія хочуць жыць у аб'яднанай Эўропе. Перамовы з ЭЗ фактычна замарожаныя. Таму і пакет галоўных патрабаваньняў Брусэлю адносна больш цеснага супрацоўніцтва з Украінай, які перадаў Януковічу эўракамісар Фюле, трымаецца ў сакрэце. У кастрычніку, калі ва Ўкраіне якраз мясцовыя выбары, Брусэль проста яшчэ раз перанясе перамовы па асацыяцыі, бязьвізавага рэжыму і свабоднай эканамічнай зоны з Украінай на нявызначаны тэрмін. Пра што ўжо сёньня заяўляюць у Брусэлі.

Перамовы з МВФ фактычна спыненыя і, як выглядае, Украіна губляе шанцы атрымаць 20 мільярдаў даляраў крэдыту. Дый у Кіеве, як адчуваецца, ужо і ня вельмі хочуць гэтага крэдыту. А дэфіцыт бюджэту будзе ўжо ў гэтым годзе ці ня большым, як у мінулым... Абяцаных Віктарам Януковічам рэформаў ўжо ня будзе. Новы прэзыдэнт канцэнтруе ўладу. Ідэйная апазыцыя ўлады ў Кіеве расколатая, распылілі і аслаблена. Адсутнічае агульнанацыянальная асоба і магутны маральны аўтарытэт, а гэта толькі ўмацоўвае намеры Януковіча як аўтарытарнага лідэра на працяглую пэрспэктыву. Народ Украіны дэзарыентаваны і расколаты, значная частка людзей зь нізкім узроўнем даходаў проста не разумее, што ж адбываецца ў дзяржаве.

Выглядае, што Ўкраіна губляе эўрапейскія арыенціры, усё больш збліжаецца з аўтарытарнай Расіяй і пераймае, дзякуючы дзеяньням Януковіча і ягонай каманды, расейскія рысы аўтарытарнага кіраваньня ... Маятнік ўлады Януковіча замест раўнамернага ваганьня ў рытме дэмакратычнага, эўрапейскага разьвіцьця, проста заграз у Крамлі. Гэта пагражае тым, што дзяржаўны гадзіньнікавы мэханізм пад назвай «Украіна» проста спыніцца і ўжо ў найбліжэйшым часе.