Беларускі незалежніцкі блёк патрабуе свабоды Аўтуховічу і Асіпенку

Алена Дубская паведаміла, што мела з сынам тэлефонную размову, у якой Арцём ня выключыў, што яго зноў пакараюць ізалятарам на 10 ці нават на 15 дзён. Нібыта гэта зьвязана з чарговым спатканьнем са сваякамі, кажа Алена Дубская.

«Што сказаў? Што яму пагражаюць карцэрам, нібыта напярэдадні нашага чарговага спатканьня. У нас спатканьне мусіць адбыцца прыкладна 20 красавіка, гэтак мы плянавалі. Сказаў, што калі не пазвоніць да 11 красавіка, значыць, зноў яго „закрылі“. А за што і як — нічога не сказаў. Што там такое можа здарыцца, я ня ведаю».

Нагадаю, Арцёма Дубскага ўжо каралі зьмяшчэньнем у гэтак званы турэмны ізалятар за парушэньне ўнутранага парадку — нібыта вязень не падняўся, калі ў пакой увайшоў супрацоўнік адміністрацыі. Арцём Дубскі мяркуе, што яму помсьцяць за збор подпісаў з патрабаваньнем палепшыць бытавыя ўмовы.

Прадпрымальнік Андэрэй Бандарэнка дагэтуль знаходзіцца ў менскім сьледчым ізалятары, дзе яго трымаюць у чаканьні суду другой інстанцыі. Бандарэнка аспрэчыў прысуд, які вынес яму суд Першамайскага раёну Менску. Бацька актывіста АГП Валер Бандарэнка ведае дакладна, што канчатковая скарга на прысуд пададзеная, але калі адбудзецца яе разгляд, яму невядома. Валер Бандарэнка плянаваў праведаць сына на гэтым тыдні, але не ўдалося і ён спадзяецца, што іх спатканьне адбудзецца неўзабаве.

«Не атрымалася ў мяне патрапіць у Менск. Разьлічваю да дня нараджэньня сына пабачыць яго. Дзень народзінаў у яго 14 красавіка».

Сёньня дакладна месяц як у Вярхоўным судзе Беларусі пачаўся працэс над Мікалаем Аўтуховічам, Уладзімерам Асіпенкам, Міхаілам Казловым і Аляксандрам Ларыным, якіх абвінавачваюць у падрыхтоўцы тэракту ды іншых злачынствах. Абвінавачванье грунтуецца ў асноўным на паказаньнях былога кіроўцы Аўтуховіча Аляксандра Ларына, які нібыта атрымаў ад свайго начальніка заданьне ўчыніць замах на старшыню Гарадзенскага аблвыканкаму Ўладзімера Саўчанку. Учора на працэсе стала вядома, што Ларын падчас сьледзтва прызнаваўся, нібыта у яго быў саўдзельнік, якога ён «зарэзаў і закапаў у лесе». Сьледзтва, аднак, на гэтую заяву Ларына, чамусьці, ніяк не адрэагавала.

Адвакат Павал Сапелка паведаміў, што Ларын праходзіў мэдычна-псыхіятрычную экспэртызу:

«Як сказаў Ларын на гэтай экспэртызе псыхіятрам, „я — розны“. Ужо цягам году мы бачым тое, што „сыплецца“ з Ларына. Застаецца спадзявацца, што прысуд расставіць усе кропкі над „і“, аддзеліць праўду ад прыдуманага».

Тым часам Беларускі незалежніцкі блёк зрабіў заяву, у якой патрабуе ад уладаў вызваліць Аўтуховіча і Асіпенку, якіх апазыцыянэры лічаць палітычнымі вязьнямі. У заяве выказваецца падтрымка і былому міліцыянту Міхаілу Казлову, пра якога сказана, што ён «змагаўся з карупцыяй на Гарадзеншыне».