У “Званках на Свабоду” слухачы разважаюць пра выбары ў мясцовыя саветы, выказваюць меркаваньні, ці варта іх байкатаваць альбо ёсьць сэнс ісьці да канца; раяць апазыцыі аб’яднацца, адгукаюцца на выкананьне чарговых сьмяротных пакараньняў. Вы таксама пачуеце выказваньні пра сьвяткаваньне Дня Волі 25 сакавіка.
Неабыякава ставяцца слухачы “Свабоды” да маючых адбыцца ў красавіку выбараў у мясцовыя саветы. Большая частка званкоў — менавіта пра выбары:
Cпадар: “Чуў, што нехта там здымае свае кандыдатуры, не жадае ўдзельнічаць у выбарах. Гэта глупства. Вунь Цімашэнка білася да канца, няважна, які ўзровень. Трэба абавязкова ўдзельнічаць, трэба абавязкова, каб абіралі. Колькі можна, хай столькі і абяруць. А што Эўропа дапаможа, назіральнікі што скажуць — ды чхаць яны хацелі на нас! Ідуць выбары. Пажадалі самі выйсьці — выходзьце, трэба ўдзельнічаць, актыўна прасоўваць сваіх людзей. Гэта вы проста здаяце пазыцыі. Нікога яны не напужаюць, ніхто нічога ня скажа. Гэта ўсё глупства”.
Спадарыня, Менск: “Мы абіраем сваіх дэпутатаў. Нам аднолькава важна, з апазыцыі ён або не. Мы толькі хацелі б, каб дэпутаты трошкі думалі пра пэнсіянэраў і іншыя малазабясьпечаныя катэгорыі грамадзянаў. Парада вам, кандыдаты: заявіце на ўвесь голас, хто вы такія і што прапануеце простаму народу, кідайце свае байкоты, ідзіце далей!”
Тацяна Барэль, Асіповічы: “Я думаю, шмат хто ў нас ведае, што выбары ў нас адбываюцца па ўказцы зьверху. Абедзьвюма рукамі за ініцыятыву Лябедзькі ня ўдзельнічаць у фарсе. Партыі павінны ў першую чаргу адстойваць свае палітычныя інтарэсы. І заявіць пра гэта трэба ў СМІ зарэгістраваным кандыдатам”.
Спадарыня: “Апазыцыю нашу, як бы яна ні назвалася — фронт, рух, партыя, — лукашэнкаўскі рэжым вельмі баіцца, інакш бы ўся гэтая надслойка над беларускім народам, якая жыве на гранты Лукашэнкі і вельмі добра на іх пачуваецца, інакш ня кідалася б так неверагодна, каб не дапусьціць апазыцыю ў працэс выбараў. Яе пусьцяць роўна настолькі, каб Эўропа і ЗША прызналі выбары дэмакратычнымі. Можа, хопіць гэтай трагікамэдыі? Байкот выбараў і толькі!”
Такія дыямэтральна розныя меркаваньні выказваюць наконт удзелу ў выбарах слухачы Радыё Свабода.
А вось меркаваньне нашай сталай слухачкі наконт кансалідацыі дэмакратычных сілаў:
Спадарыня: “Беларускі незалежніцкі блёк практычна грамадзян Беларусі ўводзіць у аблуду, прапануючы ім рабскую псыхалёгію, якая прыніжае іх годнасьць. У сувязі з гэтым гэтаму ўтварэньню лепш самараспусьціцца і ўвайсьці ў дэмакратычныя сілы. І ня трэба засьціць вочы беларусам нейкімі эўрапейскімі сіламі. Дэмакратыя і эўрапейскасьць — гэтыя два словы дапаўняюць адно адно, і ня трэба іх разрываць”.
Тэлефанаваньне слухачкі камэнтуе палітычны аналітык Аляксандар Класкоўскі:
Слухачы “Свабоды” абмяркоўваюць і праблему сьмяротнага пакараньня. Уплывовыя міжнародныя структуры, гэтаксама як і грамадзтва, выказваюць заклапочанасьць. А ёсьць і іншыя меркаваньні:
Спадар: “Наконт сьмяротнага пакараньня ў Беларусі. Вось гэтыя людзі, якія лічаць, што ня варта адмяняць, каб яны патрапілі ў такую гісторыю, калі іх бацькоў старых закатавалі, а пасьля забілі, — ці ж гэта людзі? Гэта нелюдзі. Пра людзей можна меркаваць, прымяняць расстрэл або не, а калі гэта нелюдзі? Расстрэльваць вылюдкаў!”
Вы слухаеце “Званкі на Свабоду”. Завершым праграму віншаваньнямі нашых слухачоў:
Спадар: “ 25 сакавіка — Дзень Волі. Беларусы перажылі няволю, краты, ГУЛАГ, Курапаты. Было многа стратаў. Перажывуць і Лукашэнку, які покуль дыктатар”.
Спадарыня: “Грамадзяне Беларусі! Прыміце віншаваньні зь вялікім сьвятам. Хачу вам сказаць, што наша Беларусь трымаецца, і яна будзе заўжды вольнай краінай.
Хай ад блінцоў плыве дымок,
стаіць вякамі ваша хата,
хай ад бяды ратуе Бог,
і кожны дзень вам дорыць сьвята.
Дарагія суродзічы, віншую вас. Дабра вам, здароўя, жывіце доўга, доўга!”
Тэлефануйце і пішыце! Дзяліцеся навінамі, выказвайце сваё стаўленьне да падзеяў у Беларусі і ў сьвеце. Мы таксама чакаем водгукаў на працу Радыё Свабода. Тэлефон “Свабоды” 266-39-52, працуе кругласутачна.
