Беларуская асацыяцыя журналістаў на сваім сайце паведамляе, што сёньня рэдактарцы “Магілёўскага часу” Ганьне Ільіной пазваніў чыноўнік Міністэрства інфармацыі Віктар Гурэцкі і паведаміў, што газэце ў рэгістрацыі адмоўлена, бо яе рэдактарка ня мае вышэйшай адукацыі.
Мінінфармацыі бязь ведама Ганны Ільіной зьбірала асабістыя зьвесткі пра яе асобу.
Юрысты БАЖ зьвяртаюць увагу на тое, што ў законе “Аб СМІ” (арт. 15 — “Падставы для адмовы ў дзяржаўнай рэгістрацыі СМІ”) прыведзены вычарпальны пералік выпадкаў адмовы.
“Такой падставы, як адсутнасьць вышэйшай адукацыі ў рэдактара, там няма, — падкрэсьлівае намесьнік старшыні БАЖ Андрэй Бастунец. — Наогул, гэткіх дакумэнтаў для рэгістрацыі выданьняў не патрабуецца. Гэта значыць, што Мінінфармацыі бязь ведама Ганны Ільіной зьбірала асабістыя зьвесткі пра яе асобу”.
Тым часам, прэсавая служба БАЖу паведамляе, што прадпрыемства “Белпошта” чарговы раз адмовілася ўключыць у рэспубліканскі падпісны каталёг недзяржаўную “Рэгіянальную газэту” (Маладэчна).
“Рэгіянальная газета” зарэгістраваная як рэспубліканскае выданьне, але праз падпіску мае магчымасьць распаўсюджвацца толькі па Менскай вобласьці. Ужо некалькі гадоў рэдакцыя дамагаецца вяртаньня ў сетку распаўсюджваньня па ўсёй краіне — пакуль безвынікова. У лісьце ад 7 кастрычніка за подпісам начальніка ўправы распаўсюджваньня друкаваных СМІ Марыны Вараб’ёвай паведамляецца, што РУП “Белпошта” лічыць “немэтазгодным” уключэньне “Рэгіянальнай газеты” ў падпісны каталёг на 1-е паўгоддзе 2010 года.
