Што для вас свабода?
Я ўспрымаю жыцьцё не як Свабоду, а як наканаваньне.
Што найбольш абмяжоўвае вашу свабоду?
Нішто не абмяжоўвае маю Свабоду, якую я ўспрымаю як наканаваньне.
Што для вас шчасьце?
Шчасьце — магчымасьць рабіць тое, што трэба.
Чаго вы найбольш баіцеся?
Хвароб дзяцей і блізкіх людзей. Сьмерці.
Які талент вы хацелі б мець?
Граць на музычных інструмэнтах, сьпяваць галосна і прыгожа.
Кім з сучасьнікаў вы захапляецеся?
Такіх людзей шмат. У топ-лісьце — рэдактар “Нашай нівы” Андрэй Дынько і нацыянальны лідэр Беларусі Зянон Пазьняк.
Што вы найбольш любіце рабіць?
Лавіць натхненьне.
Калі б можна было пражыць жыцьцё яшчэ раз, што б вы зьмянілі?
Усё. І пражыла б яго абсалютна інакш — хіба можна губляць такі супэрунікальны шанс?
Якую найлепшую параду вы атрымалі?
“Ня можаш ср...ць, ня мучай ср..ку”. Гэтая парада датычылася ўзяцьця складанага інтэгралу і была атрымана ад маёй найлепшай сяброўкі падчас навучаньня ў Політэхнічным інстытуце.
Які ваш улюбёны дэвіз?
Я пачула яго ад аднаго старога менчука, які шмат бачыў на сваім вяку, у тым ліку і вайну: “Змагацца і шукаць, знайсьці — і перахаваць”.
У якой палітычнай сыстэме вы хацелі б жыць?
Госпадзе! Я хацела б жыць у Заказанцы — маёй роднай вёсцы, да якой бы краіны і якой бы палітычнай сыстэмы яна ні належала.
У якой краіне вы хацелі б жыць?
У прыгожай і незасьмечанай.
У якую эпоху вы хацелі б жыць?
У эпоху Хмяльніччыны — калі б (глядзі вышэй) мела б магчымасьць пражыць жыцьцё яшчэ раз.
Калі б вы сталі кіраўніком Беларусі, што б зрабілі найперш?
Вышыхтавала ўсіх грамадзян шчыльнымі радамі і павяла б у лясы — зьбіраць сьмецьце.
Якія адносіны Беларусь павінна мець з Эўразьвязам?
Такія ж, як Эўразьвяз зь Беларусьсю.
Якія адносіны Беларусь павінна мець з Расеяй?
“Как мало берет Россия, как много дает взамен” — напісаў ня так даўно рускамоўны беларускі паэт. Але я з таго пакаленьня, якое яшчэ чула пра “Расею”, а не “Россию”, як месца, куды падчас Першай сусьветнай сілком гналі ў эвакуацыю... У той эвакуацыі загінула ці не палова гнаных... З таго часу сытуацыя мала памянялася. “Падазрыцельна” стаўлюся я да Расеі.
Некаторыя думаюць так: “Хай дыктатура, абы свая”. А вы?
Дэмакратыя — гэта лад, які гарантуе, што намі кіруюць так, як мы заслугоўваем. Дыктатура таго не гарантуе.
Калі і як у Беларусі зьменіцца ўлада?
Ня ведаю.
Калі беларусы загавораць па-беларуску?
Калі ўсьвядомяць, што нацыянальная ідэнтычнасьць — стрыжань асобы і галоўная зброя ў змаганьні са злом.
Што будзе, калі беларусы не загавораць па-беларуску?
Нічога добрага. Думаю, гэтыя абставіны могуць спрычыніцца да глябальнай катастрофы — бо ўсё ў сьвеце ўзаемазьвязана. Але такое цалкам можа быць, і тым большая адказнасьць кладзецца на нашы пакаленьні.
