Кастусь Жукоўскі арыштаваны на трое сутак, Сяргей Трыфанаў аштрафаваны на 1 мільён 50 тысячаў рублёў. З дому №35 па прашпэкце Леніна яны спрабавалі сфатаграфаваць бел-чырвона-белы сьцяг.
Гаворыць спадар Трыфанаў:
“Нас з Кастусём пакаралі за тое, што лезьлі на дах паглядзець ранішні горад і сфатаграфаваць сьцяг — нам сказалі, што на гэтым будынку нехта вывесіў нацыянальны сьцяг. Гледзімо, а ўнізе пад’ехала ўжо міліцэйская машына. Міліцыянты сталі крычаць: “Злазьце!” Ну, мы, як законапаслухмяныя грамадзяне, зьлезьлі. Нас сталі абвінавачваць, што мы нібыта сьцяг вывешвалі. Адказваем, што не вывешвалі. Міліцыянты паглядзелі — ніякага сьцяга на гэтым доме не было”.
Міліцыянты, тым ня менш, затрымалі актывістаў. Напачатку адвезьлі ў Цэнтральны райаддзел міліцыі, дзе склалі супраць іх пратаколы на дробнае хуліганства. Як кажа спадар Трыфанаў, за грукат:
“Парушылі грамадзкі парадак тым, што лезьлі па лесьвіцы пажарнай і грукат усчалі.
Адразу адвезьлі ў суд. Мне далі 30 базавых штрафу, а Кастусю — трое сутак адміністрацыйнага арышту.
Сьцяг насамрэч быў. Нас крыху дэзынфармавалі. Ён на іншым будынку быў — будынку абласнога гаспадарчага суду. Там нехта ўначы зьняў цяперашні дзяржаўны чырвона-зялёны і замест яго вывесіў бел-чырвона-белы сьцяг. Мы яго бачылі ў міліцэйскім пастарунку. Мы ж лезьлі на іншы будынак і яго ня ўбачылі. На жаль, не пашанцавала”.
Сяргея Трыфанава аштрафавала судзьдзя Цэнтральнага раёну Гомеля Алена Цалкова. Кастуся Жукоўскага пакарала арыштам судзьдзя Марына Дамненка.
