Пра гэта падчас прэсавай канфэрэнцыі заявіў начальнік упраўленьня па расьсьледаваньні злачынстваў дэпартамэнту фінансавых расьсьледаваньняў Камітэту дзяржкантролю Беларусі Дзьмітрый Адамовіч.
Ён паведаміў, што ў 2006 годзе ў Беларусі выяўлена 10 фактаў адмываньня “брудных” грошай, у 2007 годзе — 12 фактаў, у 2008 годзе — 15.
Паводле Дзьмітрыя Адамовіча, у Беларусі легалізацыя брудных грошай мае прыкметы самаадмываньня, то бок людзі самі адмываюць і самі выкарыстоўваюць брудныя грошы. Крыніцай такіх грошай найчасьцей бывае незаконнае прадпрымальніцтва. А сумы фінансавых апэрацый даходзяць да сотняў тысяч даляраў.
Паводле дырэктара фінансавага маніторынгу Камітэту дзяржкантролю Валерыя Ярашэўскага, лібэралізацыя эканомікі ў Беларусі не справакуе росту фактаў адмываньня “брудных” грошай. У 2008 годзе было пачата каля 400 крымінальных спраў аб “сумнеўных фінансавых апэрацыях”.
Згодна зь міжнароднымі экспэртамі, у сярэднім у краінах сьвету “брудныя” грошы складаюць ад 1,5% да 2% валавога ўнутранага прадукту.
Як кажа Валерый Ярашэўскі, экспэрты Эўразійскай групы па процідзеяньні легалізацыі злачынных прыбыткаў і фінансаваньню тэрарызму рэкамэндавалі Беларусі ўзмацніць кантроль за фінансавымі гісторыямі палітыкаў, VIP-пэрсонаў, людзей культуры і мастацтва. Па выніках экспэртнай праверкі, якую праводзілі ў Беларусі прадстаўнікі групы ў мінулым годзе, рэкамэндавана таксама ліквідаваць факты адмываньня злачынных грошай у казыно. Экспэрты прызналі, што ў Беларусі не выконваюцца 4 патрабаваньні ФАТФ (Міжурадавай групы па адпрацоўцы фінансавых захадаў барацьбы з адмываньнем грошай), адно зь якіх — патрабаваньне ліквідаваць у казыно легалізацыю прыбыткаў, атрыманых незаконным шляхам. Прапанавана ўзмацніць праверку кліентаў казыно.
