У судзе Чыгуначнага раёну Віцебска асудзілі за махлярства 76-гадовую жанчыну, якая 20 гадоў атрымлівала дзьве пэнсіі, паведамляе прэс-служба Вярхоўнага суду.
Суд прызнаў жанчыну вінаватай у махлярстве ў асабліва буйным памеры, зьдзейсьненым паўторна, і асудзіў на 3 гады пазбаўленьня волі.
Аднак, улічыўшы яўку з павіннай і раскаяньне ва ўчыненым, станоўчыя характарыстыкі асобы абвінавачванай, яе ўзрост і стан здароўя, было вырашана, што пакараньне не прывядуць у выкананьне, калі на працягу 2 гадоў жанчына ня зьдзейсьніць новага злачынства.
За што судзілі пэнсіянэрку
Як выявіла сьледзтва, жанчына ў 1995 годзе прынесла ў аддзел сацыяльнай абароны насельніцтва Слонімскага гарвыканкаму падробленыя дакумэнты, якія давалі ёй права на пэнсію за выслугу гадоў (25 год пэдагагічнага стажу). Насамрэч жанчына не працавала ў арганізацыях, указаных у дакумэнтах. За амаль 20 гадоў (з 1995 па 2019 год) яна атрымала агулам 27484,28 рублёў пэнсіі.
У 1999 годзе пэнсіянэрка пераехала ў Віцебск і там таксама напісала заяву на выплату пэнсіі па ўзросьце. Яна прынесла падробленую даведку аб пэрыядзе працы ў калгасе, у якім насамрэч не працавала. Дзякуючы гэтай даведцы яе агульны працоўны стаж быў павялічаны з 38 гадоў 15 дзён да 40 гадоў 2 месяцаў 5 дзён, і, адпаведна, ён налічылі большую суму пэнсіі па ўзросту. За ўвесь час ёй неабгрунтавана налічылі агулам 3582,94 рублёў.
Пэнсіянэрка сваю віну прызнала цалкам.