Над сустаршынямі БХД Паўлам Севярынцам і Віталём Рымашэўскім адбудуцца новыя суды.
27 сакавіка ў судзе Цэнтральнага раёну Менску ў 11.30 пачнецца чарговы працэс над Віталём Рымашэўскім за ўдзел у мітынгу 17 лютага. А 5 красавіка аб 11 гадзіне яго будуць судзіць ужо ў судзе Савецкага раёну Менску.
«У судах нам сказалі, што яму паведамілі пра наступныя працэсы. Значыць, так можа стацца, што 25 сакавіка ён на волю ня выйдзе», — сказала кіраўніца Хрысціянска-дэмакратычнага руху Вольга Кавалькова.
Над Паўлам Севярынцам чарговы суд прызначаны на 31 сакавіка ў Савецкім судзе Менску за ўдзел у несанкцыянаванай акцыі. Пра гэта паведаміла маці палітыка. За што канкрэтна будуць судзіць Севярынца, невядома.
Ад 10 сакавіка Віталь Рымашэўскі за ўдзел у «Маршы недармаедаў» адбывае суткі арышту ў Маладэчне, якія сканчаюцца ўвечары 25 сакавіка.
13 сакавіка Аршанскі раённы суд пакараў арыштам на 15 сутак Паўла Севярынца, якога абвінавацілі ў паўторным парушэньні парадку правядзеньня масавых мерапрыемстваў. Затрымалі Севярынца 12 сакавіка пасьля «Маршу недармаедаў».
