Суды адбудуцца над удзельнікамі ўжо другога «Маршу недармаедаў», які адбыўся ў Горадні 15 сакавіка. Васіль Корабаў, сябра прафсаюзу РЭП, сказаў Свабодзе, што ён нават ня бачыў пратакол, а міліцыянты папросту вылавілі яго на вуліцы і ўручылі позву ў суд.
— Пасьля акцыі да мяне тэлефанавалі зь міліцыі, казалі, каб прыйшоў, але нічога адносна таго, што будуць складаць пратакол. Я ім параіў прыслаць позву. А цяпер яны мяне папросту вылавілі і ўсунулі ўжо позву ў суд. Сказалі, што пратакол перададзены ў суд, маўляў, вы самі не пагадзіліся да нас прыйсьці.
На Валянціну Навумаву склалі два пратаколы: за ўдзел у несанкцыянаванай акцыі і за непадпарадкаваньне міліцыі. Пасьля акцыі яна ішла па вуліцы з плякатам, які трымала падчас акцыі. Міліцыянты хацелі забраць яе ў пастарунак.
— Я стала крычаць і клікаць на дапамогу, зьбегліся людзі з тралейбуснага прыпынку і адбілі мяне ад міліцыянтаў. Тыя паехалі, але мае дадзеныя ўстанавілі і цяпер склалі два пратаколы.
Да Мікалая Саляніка ў шпіталь, паводле ягоных словаў, прыходзілі падпалкоўнік і маёр і спрабавалі ўручыць яму пратакол, каб ён азнаёміўся і падпісаў.
— Я ім сказаў, што пакуль ляжу ў шпіталі, гаварыць зь імі ня буду. Спрачацца яны ня сталі і пайшлі.
Мікалай Салянік пасьля акцыі 15 сакавіка трапіў у шпіталь з запаленьнем лёгкіх. Ён быў асуджаны за першы «Марш недармаедаў» на 8 базавых велічынь.
Вядома, што пратакол складзены і на Антона Войцехава, але ягоны тэлефон недасягальны і пакуль невядома, ці атрымаў ён позву ў суд. За ўдзел у несанкцыянаванай акцыі 15 сакавіка адразу на другі дзень на 13 сутак арышту асуджаны Аляксандар Лаўрэнцьеў. Ён ужо адбывае пакараньне.
