Пра тое, што ў вёсцы нарадзіўся навуковец і грамадзкі дзяяч, нагадвае шыльда на школьнай сьцяне і адна з вуліц, названая ягоным імем.
Пра намеры надаць Бацэвіцкай школе імя Аркадзя Смоліча казала адна з супрацоўніц Клічаўскага райвыканкаму:
«Такое пытаньне распрацоўваецца. Яго не здымаюць з парадку дня. Мы стараемся, каб у Бацэвіцкай школе зьявілася экспазыцыя, прысьвечаная Аркадзю Смолічу. Ёсьць варыянты фінансаваньня. Мы і над гэтым пытаньнем працуем».
Паводле суразмоўніцы, штогод у верасьні праходзяць Смоліцкія чытаньні. У іх бяруць удзел усе школы раёну.
Бацэвіцкая школа
Сёлета ня выйшла назваць Бацэвіцкую школу імем Смоліча, сказалі ў навучальнай установе 29 верасьня, у дзень нараджэньня навукоўца.
«Грошай няма ў бюджэце», — патлумачыў прадстаўнік школьнай адміністрацыі.
«Пытаньне таксама паўставала з дазволам сваякоў Смоліча. А калі ўсе фармальнасьці выканаць, то зьявіцца неабходнасьць перарабляць пячаткі, дакумэнтацыю адпаведную. Таму вырашылі пакуль не кранаць гэтага пытаньня. Усё плянавалі, але потым сказалі — адбой. Але абмяркоўвалася такое пытаньне», — сказаў суразмоўца.
Музэя Смоліча няма, затое ёсьць помнік Леніну
«Музэю ў нас няма, бо наша школа адзінаццацігадовая, і, акрамя таго, у будынку, разьлічаным на васьмігодку, яшчэ і дзіцячы садок, — працягнуў ён. — У нас ніводнага квадратнага мэтру плошчы вольнага няма. Спрабуем сёлета нешта прыдумаць: замовілі стэнд пра яго, пішам зь ім карціну. Няхай хоць гэта будзе. Вуліца ў нас Смоліча ёсьць. Ягонае імя на слыху».
Сьціплая шыльда на школьным будынку кажа: «Тут, у вёсцы Бацэвічы, 29 верасьня 1891 году нарадзіўся вядомы географ, першы беларускі прафэсар геаграфіі Смоліч Аркадзь Антонавіч».
Вуліца імя Смоліча ў Бацэвічах
На ўскрайку паселішча — вуліца імя Смоліча. Яна забудаваная тыпавымі катэджамі.
Жыхары Бацэвічаў кажуць, што мала ведаюць пра навукоўца.
ТБМаўцы каля Бацэвіцкай школы. Да шыльды ўскладаюць кветкі
Улетку магілёўская суполка Таварыства беларускай мовы раздала бацэвіцкім людзям буклеты пра іхнага земляка.
«Аркадзь Смоліч — адзін з выбітных беларускіх грамадзкіх і палітычных дзеячоў, навукоўцаў. Дзякуючы такім асобам, як ён, адбылося абвяшчэньне Беларускай Народнай Рэспублікі, а затым БССР», — сказаў лідэр магілёўскіх ТБМаўцаў Алег Дзьячкоў.
Музэй у Клічаве. Кнігі Смоліча і пра Смоліча.
«Такая постаць была б знакавая ў кожнай краіне, для кожнага эўрапейскага народу. На жаль, нягледзячы на тое, што Смоліч — наш зямляк, пра яго дужа мала ведаюць на Магілёўшчыне. У падручніках гісторыі, геаграфіі згадваюць пра яго як пра навукоўца, але не як пра палітыка. Сёлета юбілейны год, і асабліва не чуваць, каб нейкія мерапрыемствы адбываліся ў гонар Смоліча. Іх ня будзе, пакуль мы іх не арганізуем і правядзём, няхай нават тымі намаганьнямі, якімі здолеем».