За два дні сутыкненьняў паліцыі і антыглябалістаў у Гамбургу затрыманыя 83 пратэстоўцы. Пра гэта паведамляе гарадзкая паліцыя ў сваім твітэры.
«Колькасьць затрыманьняў на дадзены момант складае 83, колькасьць арыштаў — 19», — гаворыцца ў заяве паліцыі.
Таксама паліцыя паведамляе, што за два дні пацярпелі 196 паліцыянтаў.
Па папярэдніх ацэнках у пратэстах удзельнічае каля 1,5 тысячы чалавек. Удзельнікі беспарадкаў падпальваюць машыны і блякуюць вуліцы, грамяць вітрыны і ўзводзяць на вуліцах барыкады. Дэманстранты ў масках і чорных капюшонах кідалі ў паліцэйскіх камяні, пэтарды і бутэлькі. Пратэстоўцаў разганяюць вадамётамі.
7 і 8 ліпеня ў нямецкім Гамбургу праходзіць саміт G20. Арганізаваныя групы пратэстоўцаў спрабуюць трапіць да будынку міжнароднага гандлёвага цэнтру, дзе праходзіць сустрэча кіраўнікоў вялікай дваццаткі.