Уладзімер Пуцін падпісаў 8 ліпеня законы з так званага «пакету Яравой», раней прынятыя Дзярждумай і зацьверджаныя Саветам фэдэрацыі, паведамляе ТАСС.
Прынятыя папраўкі робяць значна больш жорсткімі цэлы шэраг законаў і абмяжоўваюць правы, гарантаваныя расейскім грамадзянам Канстытуцыяй.
Павышаюцца тэрміны і штрафы па некалькіх артыкулах, павялічваецца адказнасьць за заклікі да тэрарыстычнай дзейнасьці і апраўданьне тэрарызму ў інтэрнэце. Укараняецца шэраг забаронаў на місіянэрскую дзейнасьць. Па справах аб тэрарызьме зьніжаны ўзрост прыцягненьня да крымінальнай адказнасьці да 14 гадоў. У крымінальны кодэкс уводзіцца артыкул аб неданясеньні.
«Пакет Яравой» таксама абавязвае апэратараў сувязі захоўваць тэлефанаваньні і перапіску кліентаў на працягу паўгода і падаваць іх праваахоўным органам — фактычна легалізуецца татальнае праслухоўваньне.
Разам з падпісаньнем «пакету Яравой» Пуцін даў ураду даручэньні сачыць за выкананьнем законаў, каб «мінімізаваць магчымыя рызыкі, зьвязаныя з выкарыстаньнем айчыннага абсталяваньня для захоўваньня зьвестак».
Апэратары сувязі, расейскія няўрадавыя арганізацыі і актывісты папярэджвалі, што нормы «пакету Яравой» у галіне праслухоўваньня і захоўваньня зьвестак патрабуюць нерэальных грашовых выдаткаў у мільярды даляраў на год.