Міністар замежных спраў Беларусі Ўладзімер Макей заявіў 20 студзеня, што беларускую гісторыю прысвойваюць сабе многія іншыя дзяржавы.
Гэта адбылося пасьля цырымоніі адкрыцьця ў цэнтры Менску мэмарыяльнай дошкі на месцы разьмяшчэньня ў 1919 годзе Камісарыяту па замежных справах Сацыялістычнай Савецкай Рэспублікі Беларусь, піша БелаПАН.
«Напрыклад, я лічу, што абсалютна няправільна, калі Ігната Дамейку ў Чылі і Тадэвуша Касьцюшку ў ЗША ўспрымаюць як прадстаўнікоў іншай дзяржавы, — сказаў Макей. — Таму мы проста абавязаныя зрабіць так, каб беларуская гісторыя была напісаная аб’ектыўна, каб бачылі, што карані беларускай дзяржавы ідуць далёка ў мінулае і што нам ёсьць чым ганарыцца».
Паводле яго слоў, у Міністэрства замежных спраў ёсьць дамоўленасьць аб сустрэчы ў бліжэйшы час з кіраўніцтвам Нацыянальнай акадэміі навук.
«Мы будзем гаварыць ня толькі пра пытаньні эканамічнага і палітычнага ўзаемадзеяньня, але і пра пытаньні ўзаемадзеяньня па гістарычнай тэматыцы. Лічу, што мы павінны зрабіць так, каб гісторыя наша была аб’ектыўная, каб наш народ бачыў, што мы зьяўляемся дзяржавай зь вялікімі даўнімі традыцыямі».