Лідэр Аб’яднанай грамадзянскай партыі Анатоль Лябедзька запрасіў прадпрымальнікаў менскага рынку «Экспабел» стаць чальцамі ягонай ініцыятыўнай групы па зборы подпісаў за ягоны ўдзел у прэзыдэнцкай выбарчай кампаніі.
Разам з паплечнікамі па партыі Анатоль Лябедзька раздаваў гандлярам адпаведныя блянкі заяваў, якія адначасна былі і ўлёткамі з фрагмэнтамі будучай перадвыбарчай праграмы. Палітык таксама размаўляў зь людзьмі, адказваў на іхнія пытаньні. Адзін з прадпрымальнікаў, паціснуўшы руку апазыцыянэру, выказаў сваё меркаваньне адносна выбараў:
«Па вопыту мінулых гадоў у выбары ня веру, але новыя імёны патрэбныя. Новыя імёны — гэта новыя людзі, і новыя ідэі, і наваўводзіны ў палітыцы, эканоміцы, сацыяльнай сфэры, і іншыя зьмены. Але тое, што сам магчымы кандыдат сустракаецца зь людзьмі — гэта непазьбежна для кожнага сапраўднага кандыдата, каб людзі маглі сапраўды ведаць, хто і што гатовы прапанаваць».
Некаторыя з гандляроў адмаўляліся прымаць улёткі, наўпрост адказваючы, што баяцца нават гэткім чынам прымаць удзел у палітыцы. Некаторыя асьцерагаліся размаўляць у прысутнасьці журналістаў, Але значная колькасьць гандляроў ахвотна бралі ўлёткі, размаўлялі з палітыкам, задавалі пытаньні і адказвалі на іх:
Карэспандэнтка: «Як вы ставіцеся да выбарчай кампаніі?»
Прадпрымальнік: «Байкот, поўны байкот. Пакуль ёсьць Лукашэнка, ніякіх выбараў быць ня можа, бо ён дыктатар».
Карэспандэнтка: «Як можна зьмяніць сытуацыю, ці варта зьмяняць?»
Прадпрымальнік: «Рэвалюцыйным мэтадам. Эвалюцыя тут не дапаможа. Гэта маё меркаваньне».
«Паход у народ» на рынку «Экспабел» прайшоў без затрыманьняў і іншых напружаных сытуацыяў. Аднак памочнікі Анатоля Лябедзькі ўсё ж скардзіліся на пільную ўвагу з боку аховы рынку.
Падсумоўваючы акцыю, Анатоль Лябедзька сказаў:
«Гэта ня першы і не апошні паход па рынках, і наша задача — не дапусьціць легітымізацыі выбараў, а таксама далучыць да палітычнага працэсу як найбольшую колькасьць людзей. Гэта можа быць праз папулярызацыю праграмы „Мільён новых працоўных месцаў для Беларусі“ — гэта дзьве галоўныя задачы.
На рынку сытуацыя вельмі розная. Некаторыя кажуць, што пакуль ёсьць Лукашэнка, выбараў ня можа быць. Але бальшыня — далёкія ад беларускай рэчаіснасьці: альбо яны абыякавыя, альбо ня здольныя быць палітычна актыўнымі. Я пачуваюся досыць камфортна — толькі 3–4 чалавекі адмовіліся браць улёткі. Гэта невялікі адсотак, таму па подпісы мы прыйдзем да заводзкіх прахадных і на рынкі».
Улёткі з заклікам далучацца да ягонай ініцыятыўнай групы па зборы подпісаў Анатоль Лябедзька ў гэты ж дзень раздаваў каля прахадной аднаго з прадпрыемстваў Менску.