У сераду, 1 студзеня, каля 15 гадзін у мястэчку Мельнік на Падляшшы прагучалі стрэлы. Паліцыя і жандармэрыя хутка пацьвердзілі, што вінаваты ў гэтай сытуацыі адзін з польскіх жаўнераў. Неафіцыйна дадаецца, што ён мог быць у стане алькагольнага ап’яненьня, адзначае выданьне wprost.pl.
Затым з афіцыйнай заявай выступіла Апэратыўнае камандаваньне польскіх узброеных сіл.
«Сёньня ўдзень у горадзе Мельнік (Падляскае ваяводзтва) вайсковец 18-й мэханізаванай дывізіі, які выконваў задачы ў рамках апэрацыі „Бясьпечнае Падляшша“, пасьля таго, як самавольна пакінуў тэрыторыю лягеру, з табэльнай зброі абстраляў цывільны аўтамабіль, затым схаваўся ў бліжэйшым лесе».
У выніку неадкладных вышуковых мерапрыемстваў яго адразу ж затрымалі вайскоўцы апэратыўнай групы ў Мельніку. Ніхто не пацярпеў.
Цяпер справай вайскоўца займаецца Вайсковая жандармэрыя ў Беластоку.
ГЛЯДЗІЦЕ ТАКСАМА: Умацаваньне мяжы зь Беларусьсю будзе каштаваць Польшчы 610 млн даляраў — намесьнік кіраўніка МУС Душчык ГЛЯДЗІЦЕ ТАКСАМА: У двух абласьцях Беларусі часова адмянілі збор за перасячэньне мяжы