Паўгода зьняволеньня атрымаў 32-гадовы падсудны, які, паводле зьвестак сьледзтва, ударыў нагой аднаго з заўзятараў, выкарыстоўваючы прыём каратэ. У выніку пацярпелы ледзь ня трапіў пад трамвай, паведаміла з залі суду газэта Het Parool. Пракуратура раней запатрабавала для яго двухгадовага тэрміну пазбаўленьня волі.
Сьледзтва адзначала, што гэты падсудны адыграў асноўную ролю ў нападах 7 і 8 лістапада. Адзначаецца, што на запісах, прадстаўленых суду, бачна, як гэты чалавек штурхае і б’е сваіх ахвяр.
Усяго тэрміны за гвалт і цялесныя пашкоджаньні атрымалі трое абвінавачаных. Двух чалавек асудзілі за абмен паведамленьнямі ў сацсетках з заклікамі нападаць на фанатаў «Макабі». Прысуды могуць быць абскарджаны цягам двух тыдняў. Агулам затрыманых у той дзень было каля сотні.
Мясцовы Цэнтар інфармацыі і дакумэнтацыі па Ізраілі (CIDI) назваў прысуды занадта мяккімі, улічваючы, як зазначаецца, «антысэміцкі характар падзей».
ГЛЯДЗІЦЕ ТАКСАМА: Вайна Ізраілю з ХАМАСам у лічбахУвечары 7 лістапада хуліганы, многія зь якіх былі ў масках напалі на ізраільскіх заўзятараў пасьля футбольнага матчу паміж клюбам «Макабі» з Тэль-Авіву і нідэрляндзкім «Аяксам». Некаторыя з тых, хто нападаў былі з палестынскімі сьцягамі і выкрыквалі прапалестынскія і антыізраільскія лёзунгі. Нападнікі таксама спрабавалі ўварвацца ў гасьцініцы, дзе спыніліся ізраільцяне. Сярод пацярпелых былі як прадстаўнікі ультрас і хуліганаў «Макабі», так і звычайныя заўзятары, якія, як адзначаецца, сталі ахвярамі атакі з прычыны сваёй нацыянальнасьці.
Падзеі выклікалі рэзкую міжнародную рэакцыю. Каля 60 пацярпелых настойваюць на кампэнсацыях.
Паводле зьвестак паліцыі Амстэрдаму, фанаты «Макабі» таксама чынілі беспарадкі, зрываючы палестынскія сьцягі, вывешаныя на будынках, і скандуючы антыарабскія лёзунгі.
На разглядзе галяндзкіх судоў зараз знаходзяцца справы супраць яшчэ 40 абвінавачаных, у тым ліку грамадзян Ізраіля.
ГЛЯДЗІЦЕ ТАКСАМА: У Амстэрдаме адбылася сэрыя нападаў на ізраільцянаў