Некалькі суразмоўцаў Свабоды паскардзіліся на новую рассылку ад чат-бота «Сумленны выбар». Людзі непакоіліся, што такая рассылка можа быць небясьпечнай для тых, хто знаходзіцца ў Беларусі. Новая рассылка тычылася новых прэзыдэнцкіх выбараў, прызначаных на 26 студзеня.
Гэты бот быў створаны ў 2022 годзе. Адзін з суразмоўцаў Свабоды абурыўся, «няўжо, людзі не разумеюць, што ў Беларусі для нас гэта небясьпечна».
Што зь бясьпекай гледачоў у Беларусі і чаму яны ня могуць выдаліць бот «Честных людей» раз і назаўжды? Пра гэта Свабода спытала ў кіраўніцы «Честных людей» Алены Жываглод.
Суразмоўца кажа, што праз тэхнічныя асаблівасьці самой плятформы Telegram боты выдаляюцца няпроста, з гэтым сутыкнуліся многія карыстальнікі і стваральнікі ботаў у Беларусі. Пра гэтую праблему пісалі «Кібэрпартызаны».
Алена Жываглод
«Калі коратка, простае блякаваньне ботаў у аплікацыі Telegram адпраўляе іх у чорны сьпіс, у якім іх могуць знайсьці пры аглядзе ці допыце сілавікі. І мы, „Честные люди“, ведаючы пра гэта і перажываючы за бясьпеку людзей, яшчэ ў 2022 годзе ў галоўнае мэню і ўсе экраны працы з ботам дадалі кнопку „Выдаліць акаўнт“. Па націску гэтай кнопкі бот адпісвае карыстальніка ад усіх будучых рассылак, а карыстальнік атрымлівае інструкцыю па ачыстцы сьлядоў бота на сваёй прыладзе», — патлумачыла Алена Жываглод.
Па яе словах, гэта адзіны варыянт бясьсьледнага выдаленьня ботаў. Яна просіць людзей, якія сутыкнуліся з такой праблемай, пісаць на info@honestby.org.
Алена Жываглод дадала, што камунікацыю праз гэты бот «Честные люди» вядуць толькі ў пэрыяд выбараў, пры гэтым магчымасьць выдаліць бот захоўваецца заўсёды.
«Яшчэ перад выбарамі ў Палату прадстаўнікоў, сабраўшы зваротную сувязь ад нашых падпісчыкаў (карыстальнікаў бота), мы прынялі рашэньне, што трэба захаваць бот як канал камунікацыі, аднак мы ўкаранілі новую тэхналёгію, якая дазваляе карыстальніку пераназываць бот з „Честный выбор“ у любую назву. Для тых, хто хоча далей атрымліваць рассылкі, гэта робіць бот менш прыкметным у выпадку прагляду тэлефона сілавікамі.
Бот „Честный выбор“ існуе з 2021 году. Пры гэтым апошнюю рассылку ў рамках гэтага бота мы правялі пасьля анонсу даты выбараў-2025, і разам з гэтай рассылкай мы чарговы раз нагадалі ўсім карыстальнікам пра тое, як выдаляць гэты бот», — кажа кіраўніца ініцыятывы.
ГЛЯДЗІЦЕ ТАКСАМА: «Люстэрка»: Заклікі галасаваць за блёк Азарава на выбарах у КР атрымалі і тыя, хто ня быў у пляне «Перамога»