Паводле пастановы Савета міністраў, апублікаванай 10 сьнежня за подпісам прэм'ер-міністра Рамана Галоўчанкі, да 1 лютага 2025 году дзяржаве павінны бязвыплатна перадаць долі дзьвюх юрыдычных асобаў у статутным фондзе Беларуска-нямецкага сумеснага таварыства з абмежаванай адказнасьцю «Дзіцячы рэабілітацыйна-аздараўленчы цэнтар „Надзея“».
Доляй у 50,7% (вартасьцю ў 14,995 млн беларускіх рублёў) валодала нямецкае аб’яднаньне «Сябры дзіцячага цэнтру „Надзея“ ў Нямеччыне». Доля ў прыкладна 25% (7,432 млн рублёў) належала беларускаму сацыяльна-экалягічнаму грамадзкаму аб’яднаньню «Жывое партнэрства».
Дзіцячы рэабілітацыйна-аздараўленчы цэнтар «Надзея» быў створаны ў 1994 годзе. Спачатку цэнтар займаўся выключна санаторна-курортным лекаваньнем і аздараўленьнем дзяцей, якія жывуць на тэрыторыях, забруджаных радыёнуклідамі з прычыны катастрофы на Чарнобыльскай АЭС. Цяпер цэнтар прымае і дзяцей іншых мэтавых групаў, у тым ліку дзяцей з рознымі хранічнымі захворваньнямі, дзяцей з асаблівасьцямі разьвіцьця і дзяцей з бацькамі.
У структуру ўстановы ўваходзяць летні турыстычна-аздараўленчы намётавы лягер «Крыніца» і база адпачынку «Вілія». Цэнтар можа прымаць 380 чалавек падчас навучальнага году і каля 850 чалавек у летні пэрыяд.
Цэнтар неаднойчы атрымліваў званьне найлепшай установы свайго тыпу ў Беларусі.
ГЛЯДЗІЦЕ ТАКСАМА: 388 тысяч сонечных модуляў, мэталапракатны завод. Як беларуская дзяржава забірала прадпрыемствы ў інвэстараў ГЛЯДЗІЦЕ ТАКСАМА: «Люстэрка»: Чыноўнікі забіраюць ва ўласнасьць дзяржавы былы McDonald’s