Прэзыдэнт Украіны Ўладзімір Зяленскі заявіў, што ад пачатку поўнамаштабнай вайны Расеі супраць Украіны загінулі 43 тысячы ўкраінскіх вайскоўцаў.
«Нашы людзі цаной свайго жыцьця абараняюць свой дом, і кожнае жыцьцё нашых воінаў і нашых цывільных каштоўнае для нас. Ад пачатку поўнамаштабнай вайны Ўкраіна страціла 43 тысячы ваяроў, якія загінулі на полі бою. 370 тысяч выпадкаў аказаньня дапамогі параненым, і гэта з улікам, што ў нашым войску прыблізна 50 адсоткаў параненых вяртаюцца ў шэрагі, і фіксуюцца ўсе раненьні, у тым ліку лёгкія і паўторныя», — заявіў Уладзімір Зяленскі ў сваім відэазвароце ўвечары 8 сьнежня.
Паводле яго, узровень франтавой мэдыцыны ва Ўкраіне значна вышэйшы, чым у Расеі.
Уладзімір Зяленскі дадаў, што зь верасьня 2024 году Расея страчвае на полі бою вайскоўцаў у 5-6 разоў больш, чым Украіна. Паводле яго, ва Ўкраіне загінулі 198 тысяч расейцаў і больш за 550 тысяч атрымалі раненьні.
У ЗША пацьвердзілі расейскія страты на вайне ва Ўкраіне
Міністар абароны ЗША Лойд Остын заявіў, што ў часе поўнамаштабнай вайны супраць Украіны Расея страціла сама меней 700 тысяч вайскоўцаў і больш за 200 мільярдаў даляраў.
«Расея заплаціла ашаламляльную цану за неразважлівасьць Пуціна... У апошнія месяцы Расея страчвае да тысячы чалавек штодзень. І страты Расеі толькі за першы год выбранай Пуціным вайны, падобна, перавысілі страты Масквы ва ўсіх яе канфліктах з часоў Другой усясьветнай вайны, разам узятых», — сказаў Лойд Осьцін на Нацыянальным форуме ў пытаньнях бясьпекі ў Каліфорніі 7 сьнежня.
Расея і Ўкраіна практычна не даюць агульнай інфармацыі пра свае страты ў вайне і прыводзяць непацьверджаныя зьвесткі пра страты праціўніка.
У лютым 2024 году прэзыдэнт Украіны Ўладзімір Зяленскі казаў, што за час поўнамаштабнага ўварваньня Расеі загінулі 31 тысяча ўкраінскіх вайскоўцаў.