Прэзыдэнт Расеі Ўладзімір Пуцін скасаваў правядзеньне «Ўсясьветных гульняў дружбы» ў Расеі. Указ апублікавалі на сайце афіцыйных прававых актаў Расеі. Спартовыя спаборніцтвы ня будуць праводзіцца да асаблівага распараджэньня, сказана ў дакумэнце.
Аб правядзеньні «Гульняў дружбы» расейскія ўлады заявілі ў чэрвені 2023 году на фоне адхіленьня расейскіх атлетаў ад міжнародных спаборніцтваў за расейскую вайну ва Ўкраіне. Яны абяцалі прыняць тысячы спартоўцаў з розных краін; акрамя традыцыйных алімпійскіх дысцыплін, там павінны былі прайсьці спаборніцтвы ў акрабатычным рок-н-роле, нардах і спартовым праграмаваньні.
Спаборніцтвы павінна былі прайсьці ў Маскве і Екацерынбурзе ў пачатку восені 2024 году. Затым яго перанесьлі на 2025-ы.
За перамогу спартоўцам абяцалі 40 тысяч даляраў, другое і трэцяе месца ацанілі ў 30 і 20 тысяч адпаведна. На спаборніцтвы плянавалі выдзеліць $83 млн.
ГЛЯДЗІЦЕ ТАКСАМА: МАК заклікаў спартоўцаў і ўрады краін адмовіцца ад удзелу ў «палітызаваных» Гульнях дружбы ў РасеіСупраць турніру рэзка выступілі Міжнародны алімпійскі камітэт (МАК) і міжнароднае антыдопінгавае агенцтва WADA. Генэральны дырэктар расейскага антыдопінгавага агенцтва РУСАДА Вераніка Логінава заяўляла «РИА Новости»што акрэдытаваныя лябараторыі адмовіліся прымаць вынікі ўзятых на турніры допінг-тэстаў.
Да «Гульняў дружбы» не плянавалі дапускаць расейскіх спартоўцаў, якія выступілі на Алімпіядзе ў Парыжы пад нэўтральным сьцягам. Ніводная з краін, акрамя Беларусі, аб удзеле не заяўляла. Беларусь таксама пад моцнымі санкцыямі ў спартовым сьвеце, беларускія атлеты на міжнародных стартах, у тым ліку на Алімпіядзе, выступаюць пад нэўтральным сьцягам.
Ва ўказе Пуціна гаворыцца, што спаборніцтвы скасаваныя «ў мэтах абароны правоў спартоўцаў». Адлічэньні ад букмэкераў Пуцін загадаў перадаць у новы, яшчэ ня створаны фонд падтрымкі спорту ў Расеі.
ГЛЯДЗІЦЕ ТАКСАМА: Прыніжаныя і адрынутыя. Алімпіяда, якая паказала сапраўднае стаўленьне сьвету да дыктатур Лукашэнкі і Пуціна