Аб распрацоўцы комплексу з такой назвай у 2021 годзе паведамлялі расейскія СМІ са спасылкай на крыніцы. Тады сьцьвярджалася, што гаворка ідзе аб «стратэгічным комплексе новага пакаленьня» і што праект толькі на стадыі распрацоўкі.
Прэзыдэнт Расеі Ўладзімір Пуцін у сваім выступленьні ўвечары 21 лістапада назваў ракету, якой ударылі па Дняпры, «Арэшнікам». Ён адзначыў, што гаворка ідзе аб гіпэргукавой балістычнай ракеце сярэдняй далёкасьці ў няядзерным выкананьні.
Паводле ГУР, падлётны час гэтай расейскай ракеты з моманту запуску ў Астраханскай вобласьці да падзеньня ў горадзе Дняпро склаў 15 хвілін. На ракеце было ўстаноўлена шэсьць баявых частак, кожная зь якіх мае шэсьць суббоепрыпасаў. Хуткасьць на канцавым участку траекторыі — больш за 11 махаў (1 мах роўны хуткасьці гуку ў паветры — 1224 км на гадзіну), гэта значыць нават больш, чым сьцьвярджаў Пуцін. ГУР таксама заявіла, што да распрацоўкі мабільнага ракетнага комплексу «Кедр» быў прыцягнуты шэраг прадпрыемстваў вайскова-прамысловага комплексу Расеі, а яго выпрабаваньні праходзілі на палігоне Капусьцін Яр у мінулым і бягучым годзе.
Адкрытыя крыніцы, якія прааналізавала Радыё Свабода, пацьвярджаюць, што ракета, запушчаная па Дняпры, была зробленая ў Расеі. Сярод яе абломкаў знайшлі дэталь з маркіроўкай Цэнтральнага навукова-дасьледчага інстытуту аўтаматыкі і гідраўлікі (ЦНДІЯГ). Ён распрацоўвае і стварае высокадакладныя сыстэмы кіраваньня, якія прымяняюцца ў ракетных комплексах «Іскандэр», «Таполя-М», «Булава». Гэтую ж маркіроўку можна ўбачыць у дзяржзакупках Воткінскага заводу, які зьбірае гэтыя ракеты. Пры гэтым у паведамленьні ГУР ні ЦНДІЯГ, ні Воткінскі завод ня згадваюцца. Расейскія афіцыйныя асобы сьцьвярджэньня ГУР не камэнтавалі.
ГЛЯДЗІЦЕ ТАКСАМА: Пуцін папярэджвае пра новыя баявыя выпрабаваньні «Арэшніка» і кажа пра рашэньне аб сэрыйнай вытворчасьці ракетыЭкспэрты пасьля паведамленьняў пра запуск ракеты, якую раней Расея ў вайне супраць Украіны не выкарыстоўвала, абмяркоўваюць яе магчымыя характарыстыкі і тое, ці зьяўляецца «Арэшнік» новай, раней невядомай зброяй або гэтак пазначана якая-небудзь з ужо вядомых ракет, якія знаходзяцца на ўзбраеньні Расеі. Financial Times са спасылкай на высокапастаўленую ўкраінскую крыніцу піша, што гаворка, верагодна, ідзе аб ракеце, выпушчанай з ракетнага комплексу «Рубеж» з радыюсам дзеяньня да 6000 кілямэтраў. Пра тое, што ракета, верагодна, зьвязаная з комплексам «Рубеж», заявілі і ў Пэнтагоне.
Першапачаткова ўлады Ўкраіны заяўлялі, што ўдар мог быць нанесены міжкантынэнтальнай балістычнай ракетай, аднак крыніцы ў краінах Захаду гэта адмовілі. Агульная думка экспэртаў — што гэта была ракета сярэдняй далёкасьці.
ЗША і іх саюзьнікі асудзілі ўдар па Дняпры і выкарыстаньне Расеяй новага тыпу ўзбраеньняў. У Маскве, у сваю чаргу, назвалі гэта адказам на ўдары Ўкраіны па Расеі заходняй далёкабойнай зброяй.
26 лістапада ў Брусэлі з ініцыятывы Ўкраіны пройдзе пасяджэньне Рады Ўкраіна — NATO. Тэмай абмеркаваньня будзе прымяненьне Расеяй па Дняпры балістычнай ракеты сярэдняй далёкасьці.
ГЛЯДЗІЦЕ ТАКСАМА: «Прапагандысцкі ўдар, дэманстрацыя магчымасьцяў». Экспэрты тлумачаць, навошта Расея выпусьціла па Ўкраіне балістычную ракету «Арэшнік»Пасяджэньне Вярхоўнай Рады Ўкраіны 22 лістапада было адмененае з прычыны падвышанай пагрозы ракетнага нападу, сьцьвярджаюць украінскія СМІ са спасылкай на дэпутатаў. Таксама скарочаная колькасьць дзяржаўных служачых, якія выйшлі ў пятніцу на працу ў вышэйшых органах улады Ўкраіны. У Кабінэце міністраў і Офісе прэзыдэнта, аднак, кажуць, што яны працуюць у звычайным рэжыме.
Пуцін у сваім выступе заявіў, што ў выпадку, калі Расея зноў прыменіць «Арэшнік», яна будзе загадзя папярэджваць цывільнае насельніцтва. Ягоны прэс-сакратар Дзьмітрый Пяскоў у пятніцу сказаў, што мэханізмы такога апавяшчэньня прапрацоўваюцца.
Прэс-сакратар Белага дому Карын Жан-П’ер заявіла, што ў ЗША ведалі пра маючы адбыцца запуск і папярэдзілі пра яго Ўкраіну і сваіх партнэраў. 20 лістапада, за суткі да запуску, пасольства ЗША ў Кіеве часова зачынілася ў сувязі з пагрозай расейскага нападу — тады, зрэшты, гаворка ішла не пра пуск новай ракеты, а пра пагрозу масаванага авіяўдару. 21 лістапада пасольства зноў адчынілася.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.